HEIDELBERG NUUS - Heidelberg-rugbyklub, oftewel Heibi soos hulle alombekend is, het Saterdag 28 Maart hul derde agtereenvolgende wedstryd van die seisoen teen Harlequins van Oudtshoorn op 'n drafstap gewen.

In die proses het hulle nege drieë teenoor die drie van hul teenstanders ingeryg. Rustyd het hulle nog naelskraaps met 24 - 20 voorgeloop in hul SWDRVU Superliga-A tuiswedstryd. Die eindtelling was 'n skaflike 56 - 25 vir Heibi.

Die wedstryd was hard voor- en agterlangs en daar is mooi hardlooprugby deur beide spanne gespeel.

Heibi se vleuels het behoorlik baljaar, met Cortleigh Boesak en Lleyton September wat elkeen 'n driekuns behaal het, terwyl Jaydian September, Ralton October en Daylin Manho elk eenkeer gaan druk het.

October het ook 'n strafskop en vier doelskoppe bygevoeg.

Die tweede span wat rustyd  met 17 - 8 voorgeloop het, het hulle wedstryd met 'n telling van 39 - 18 gewen.

Die derde span was ook aan die wenkant en  nadat hulle rustyd 3 - 0 voorgeloop het was hulle eindtelling 23 - 14.

Die wedstryd was goeie voorbereiding vir hul deelname aan die Ebrahim Patel Paasnaweektoernooi waar hulle Donderdagaand hul eerste wedstryd teen SAFCOL speel.

‘Ons bring jou die nuutste Tuinroete, Hessequa, Karoo nuus’