STILBAAI NUUS - Die jaarlikse Stilbaai Classic-kompetisie het op 26 en 27 September onder ideale weerstoestande plaasgevind, met kajakvaarders wat van heinde en ver opgedaag het om aan die verskillende wedrenne deel te neem.
Saterdag het 29 kajakke die 20 km-wedren op see aangepak, waarvan 27 die uitdagende roete suksesvol voltooi het.
In die dubbelkajuitafdeling het Ian Trautmann en Graham Neate koning gekraai, terwyl Heinrich van Rooyen die enkelkajakafdeling gewen het. Stephanie von der Heyde was die eerste vrou oor die eindstreep in die 20 km-wedren.
Sondag het die kompetisie na die Goukourivier verskuif waar 26 kajakke die10 km-wedren aangedurf het en 24 deelnemers vir die 20 km-wedren weggespring het. Van die deelnemers het met 'n glimlag erken dat hulle nog styf was ná die vorige dag se strawwe kompetisie. Vyf kajakke kon uiteindelik nie die 20 km-afdeling voltooi nie.
Ian Trautmann het die 20 km-wedren in 1:36:54 gewen, met Stephanie von der Heyde slegs een sekonde agter hom in 1:36:55 om as eerste vrou te eindig.
Die mans dubbelkajuitafdeling is gewen deur Howard Thomson en Brian van der Laan in 1:39:49.
In die 10 km-dubbelkajuitafdeling het Brian Wheal en Johan Labuschagne die eerste plek behaal met 'n tyd van 0:50:26, terwyl Tunis Meerholz die enkelkajakafdeling in 0:55:19 gewen het.
Pierre Fourie en Ilse Fritz het die gemengde dubbelkajuitafdeling gewen in 0:58:26. Annabelle Nothnagel was die eerste vrou oor die eindstreep met 'n wentyd van 1:04:38.
Bettina Turiglio en Polly Foster het die vrouedubbelkajuitafdeling in 1:06:03 gewen. Die enigste driesitplekkajak beman deur Clifton Donald, Annalet Donald en Linda van Graan, het die wedren in 1:00:11 voltooi.
Hoewel stormweer aanvanklik vir Saterdag voorspel is, het die slegte weer uiteindelik hoofsaaklik in die binneland verbygetrek. Dit het deelnemers in staat gestel om 'n heerlike naweek van kompetisie, sportmangees en kameraderie te geniet.
Heelwat deelnemers het reeds aangedui het dat hulle volgende jaar beslis weer na Stilbaai sal terugkeer vir die gewilde Classic-kompetisie.
‘Ons bring jou die nuutste Tuinroete, Hessequa, Karoo nuus’
