ALBERTINIA NUUS - Altesaam 9 952 perlemoen is vanoggend deur die Suid-Kaap Blitspatrollie, kort na 'n jaagtog op die N2, gevind.
Lede van die blitspatrollie, adjudant offisier Hein Liebenberg en sersant Thembalethu Blaai het patrollie gery toe hulle 'n verdagte Ford Ranger wat in die rigting van Albertinia na Mosselbaai onderweg was, agterna gesit het.
Die bakkie het weggejaag met die blitspatrollie agterna.
Volgens inligting het die bestuurder van die verdagte voertuig by die Gourits brug beheer oor die bakkie verloor en deur bosse gejaag waarna die voertuig tot stilstand gekom het. 'n Onbekende getal verdagtes het uitgespring en weggehardloop.
Die blitspatrollie het sakke perlemoen ter waarde van R900 000 in die voertuig gekry.
Die perlemoen weeg altesaam 1 126kg.
Lede van die Langeberg K9-honde-eenheid het die gebied met snuffelhonde nagegaan.
'n Spoor is vir 2km gevolg wat weer na die N2 teerpad gelei het.
Nog geen verdagtes gearresteer nie.
Meer inligting volg soos dit bekend word.
'Ons bring jou die nuutste Albertinia, Hessequa nuus'
