RIVERSDAL NUUS - Voortslepende bewerings van swak reaksie en optrede tydens huisbrande wat bevraagteken word het weer kop uitgesteek.
Suid-Kaap FORUM het vroeg in die nuwejaar 'n e-pos ontvang met betrekking tot 'n huisbrand wat gedurende Desember op Riversdal plaasgevind het. Daarin word beweer dat brandweertoerusting nie werk nie, personeel skynbaar nie weet wat hulle doen nie en dat reaksietyd te stadig is.
Hessequa Munisipaliteit en Eden Distriksmunisipaliteit word nou blameer omdat die huis afgebrand en die eienaar die meeste van haar aardse besittings verloor het.
Adneshel Voss, Hessequa verkeershoof verantwoordelik vir huisbrande noem in antwoord op 'n navraag van die koerant dat Hessequa se brandweerpersoneel binne nege minute op die toneel was nadat die oproep om hulp ontvang is.
“Die vuur is afgekoel en is ‘n veiligheidslint gespan om die gemeenskap op ‘n veilige afstand te hou van die brandende struktuur. Die brand was egter reeds in ‘n gevorderde stadium met aankoms.”
Die brand was volgens hom ongeveer na ‘n uur onder beheer en was daar twee vertrekke wat gered kon word. “Op geen stadium is lede van die gemeenskap gevra om hulp te verleen nie. Die instruksie was dat vertrekke wat gered kan word, koud gehou en geblus word. Die optrede van die betrokke personeel was professioneel en van ‘n opgeleide gehalte.”
'Ons bring jou die nuutste Riversdal, Hessequa nuus'
