HESSEQUA NUUS - Twee goue medaljes en 'n brons medalje het die afgelope naweek saam met Hessequa se brandbestryders huis toe gekom nadat hulle hul krag, uithouvermoë en deursettingsvermoë teen van Suid-Afrika se bestes getoets het.
Agt lede van die Hessequa-brandweer, redding en rampbestuur het van 1 tot 3 Oktober aan die Toughest Firefighter Alive South Africa (TFA SA) in George deelgeneem.
Hessequa het ook 'n aflosspan vir die kompetisie ingeskryf.
Amanda Twalo was een van Hessequa se uitblinkers en het twee medaljes gewen.
Sy het goud in haar ouderdomsgroep in die vrouekategorie gewen, asook 'n brons medalje in die algehele vrouekategorie.
Daarmee het sy die derde plek onder die vroue behaal.
Rano Africa het Hessequa se tweede goue medalje ingepalm toe hy eerste in sy ouderdomsgroep geëindig het.
Die ander Hessequa-deelnemers was spankaptein Heinric Prins, Donovan Hess, Willbur January, Ronald Makaba, Nehemia Paulsen en Francois Koen.
Die Toughest Firefighter Alive-kompetisie is 'n internasionaal erkende uitdaging wat spesifiek ontwerp is om brandbestryders se fisieke én geestelike vermoëns tot die uiterste te toets.
Die deelnemers moet 'n reeks brandweer-spesifieke hindernisse en take voltooi wat krag, spoed, uithouvermoë, vaardigheid en deursettingsvermoë vereis.
Die kompetisie is op die internasionale Toughest Firefighter Alive-konsep gegrond en boots fisieke eise na waarmee brandbestryders tydens noodsituasies te doen kry.
Gelukwensing
Hessequa se brandweerhoof, Daniël Dippenaar, het die span met hul prestasie gelukgewens. "Julle het nie net aan 'n kompetisie deelgeneem nie, julle het gewys waarvan Hessequa se brandweer gemaak is.
Julle het julself fisiek en geestelik tot die uiterste gedruk, maar nooit opgehou om mekaar te ondersteun nie," het Dippenaar gesê.
Volgens hom is die medaljes 'n beloning vir die harde werk wat die span ingesit het, maar was hul spanwerk net so belangrik.
"Amanda en Rano, baie geluk met julle goue medaljes, en Amanda met jou besonderse derde plek in die algehele vrouekategorie.
Aan die hele span: ek is trots op elkeen van julle."
Hy het gesê die deelnemers dra nie net hul medaljes huis toe nie, maar ook die naam van Hessequa en die trots van die plaaslike brandweerdiens.
Die span se vertoning het Hessequa met twee goue medaljes en 'n brons medalje beloon, asook met 'n uitstekende prestasie in een van die land se veeleisendste brandweerkompetisies.
‘Ons bring jou die nuutste Tuinroete, Hessequa, Karoo nuus’
