MELKHOUTFONTEIN NUUS - Soms spreek 'n foto meer as 'n duisend woorde...
Suid-Kaap Forum se Goue Oues-projek gee elke maand aan bejaardes in tehuise in die Hessequa-streek geskenke op hul verjaarsdae. Tans bedien dié projek wat reeds twee jaar aan die gang is 400 bejaardes.
Die sukses hiervan het reeds alle verwagtinge ootref, asook die goedgesindheid van plaaslike sakelui en inwoners wat op gereelde basis hul harte en beursies oopmaak met skenkings. Dit sorg dat die projek lewensvatbaar bly en word elke skenking, hoe groot of klein opreg waardeer.
Op dié manier kon die koerant reeds op spesiale dae soos Valentynsdag, Paasfees, Moedersdag, Vadersdag en Kersfees geskenke uitdeel. Buiten skenkings is daar die talentvolle inwoners en skoolkinders wat nie huiwer om op kort kennisgewing betrokke te raak nie - van musiek, sing tot versies wat voorgedra word.
Vir die personeel van Suid-Kaap Forum is dit 'n riem onder die hart om die ongelooflike vreugde in die bejaardes se gesigte te ervaar, wat net weer bewys dit is wel die klein gebare in die lewe wat mense aanraak.
Op Stilbaai val Soeterus Versorgingsoord onder die tehuise wat geskenke ontvang. Moedersdag geskenke, asook Mei se verjaarsdaggeskenke is Vrydag 5 Mei oorhandig. Susanna Moolman (foto) was so opgewonde oor haar geskenk dat sy die joernalis om die nek geval en 'n paar klapsoene gegee het - pure vreugde, liefde en medemenslikheid!
In vandag se gejaagde lewe is dit so maklik om die waarde en noodsaaklikheid van aanraking, vriendelikheid, deernis en omgee te vergeet.
In Afrika is die term Ubuntu nie vreemd nie - dit is die lewensingesteldheid van medemenslikheid, hulpvaardigheid en barmhartigheid en word soms op 'n meer filosofiese manier beskryf - die geloof in 'n universele band van mededeelsaamheid wat die mensdom verbind.
Ubuntu
deur Engemi Ferreira
amper eetbaar soos 'n toffie,
of 'n drinkding soet soos koffie,
maar sou ons dit kon uitrek soos 'n rekker?
Sou ons dit kan benut as 'n kombers?
Sou ons daarmee kon lig maak soos 'n kers?
Sou ons iemand se pyn kan streel
of sommer net met ander kan deel?
Sou ons kan omgee vir mekaar?
Sou ons op eens humeure kan bedaar
Sou ons oorloë kan beëindig?
en bose plekke daarmee heilig.
Wat beteken Ubuntu rêrig
en hoe sou ons dit kon gebruik?
As niemand ons kan inlig nie,
soveel take, maar nooit genoeg woorde
want ons ken nog nie almal die taal van die hart nie...
ARTIKEL EN FOTO: LOUISE MOUTON, SUID-KAAP FORUM-JOERNALIS
'Ons bring jou die nuutste Melkhoutfontein, Hessequa nuus'
