HESSEQUA NUUS - Met die verwoestende veldbrande wat die afgelope maand amok gesaai het in die gebied, is voorbrande tans 'n gonswoord onder inwoners en boere.
Suid-Kaap Forum het by Charl Wade (Southern Cape Fire Protection Agency) gaan aanklop oor dié onderwerp. Dié proses word na verwys as die aansteek van beheerde brande in die proses van geïntegreerde brandbestuur.
Wade beklemtoon dat die SCFPA tans niks te doen het met die uitreik brandpermitte vir dié brande nie, omdat dit die Hessequa Munisipaliteit se funksie is.
"Die betrokke grondeienaar kontak hulle, waarna 'n munisipale amptenaar 'n inspeksie op die betrokke grond doen. Indien alles in orde is word 'n permit uitgereik wat van toepassing is vir die persoon en die spesifieke plaas of stuk grond."
Die permit verleen nie toestemming dat 'n grondeienaar enige tyd kan brand nie.
"Die dag waarop beplan word om te brand, moet die munisipale amptenaar geskakel word waarna 'n brandnommer verskaf word wat net vir daardie spesifieke dag geldig is. Dit kan ook slegs gebeur indien toestande daardie dag gunstig is vir 'n beheerde brand."
Dit is van die SCFPA-lede en ander grondeienaars se grootste uitdagings, asook 'n groot frustrasie, aldus Wade.
"Dit word bepaal volgens streke en munisipale gebiede. Die probleem is meestal dat die Fire Danger Index (FDI) toon 70 oranje vir Hessequa, maar langs die kus is die FDI groen of geel. Brandpermitte word dan nie toegestaan nie want volgens die Suid-Afrikaanse Weerburo (SAWS) is daar nie veronderstel om enige brande op oranje of rooi FDI-dae gedoen te word nie"
Hy verduidelik dat die SCFPA reeds 'n jaar gelede addissionele weerstasies opgerig het sodat dié spesifieke probleem aangespreek kan word."
Slegs Stilbaai en 'n tweede tussen Witsand en De Hoop is in werking.
Die inligting word deur Avis Weerdiens gebruik, maar volgens wet is dit tans nie 'n erkende weerstasie nie, wat beteken SAWS is die enigste wie se inligting wettiglik gebruik mag word. Dit is egter 'n tydsame proses waarmee die SCFPA geruime tyd besig is, asook verskeie rolspelers."
Die SCFPA is tans in proses om ondersoek in te stel om die uitreik van beheerde brandpermitte vir hul lede te vergemaklik.
"Voorbrande verwys oor die algemeen na die aansteek van 'n stuk veld/bos/grasveld om 'n aankomende vuur te stuit - dit word geassosieer tydens onbeheerde brande om 'n onbeheerde brand te stop of die spoed daarvan te breek."
Tans is daar heelwat faktore wat in ag geneem moet word tydens 'n voorbrand: die helling, windspoed en rigting verandering, hulpbronne wat beskikbaar is, die veldsoort en infrastruktuur.
"Dit gebeur gereeld dat 'n grondeienaar 'n voorbrand op sy grond of selfs op sy buurman se grond aansteek en meer skade aanrig as wat die beheerde brand sou gedoen het, soos nou weer gesien is tydens die Klipfontein/Stilbaai vure vroeër die maand."
Indien voorbrande gemaak word tydens 'n onbeheerde brand is dit krities om die partye betrokke in die lug, asook alle brandbestrydingsorganisasies betrokke in te lig daarvan.
"Dit gebeur soms dat die voorbrande doodgespuit word deur grondspanne of selfs deur lugondersteuning omdat hulle nie bewus was van die betrokke voorbrand wat gedoen is nie."
'Ons bring jou die nuutste Hessequa nuus'
