HESSEQUA NUUS - Papier, glas, tin en metaal word deesdae met groot sukses herwin, maar toksiese afval bly 'n kopseer.
Dit het Hessequa Munisipaliteit genoodsaak om 'n behoeftebepaling in die gemeenskap te loods. Susan Geldenhuys (mediawoordvoerder: Hessequa Munisipaliteit) verduidelik dat met die diensteverskaffer Enviroclaim saamgewerk word.
"Die projek sal in Maart afskop om dié soort afval op elke sentrale dorp te herwin. Dit sluit buiten huishoudings, onder andere ook besighede en skole in."
E-afval moet volgens voorgeskrewe wetgewing en vereistes hanteer, behandel en geberg word deur 'n goedgekeurde kontrakteur en fasiliteit, anders word dit saam met gewone afval begrawe.
Die chemiese stowwe wat dan opbreek, infiltreer die grond as gifstowwe wat saam met bakterieë versprei wat in gasse omskep word en in die atmosfeer ontsnap.
Toksiese inhoud bestaan uit bestanddele soos lood (Pb), kwik (Hg), kadmium (Cd), selenium (Se) en ander stowwe wat gevaarlik is vir die mens se gesondheid en die gesondheid van eko-sisteme. Dit word verdeel in drie kategorieë, naamlik items wat opgeknap, herwin en veilig ontslae van geraak moet word.
Herwinning verwyder nuttige, skaars en waardevolle metale en ander stowwe terwyl giftige E-afval in spesiale afvalfasiliteite vir gevaarlike afval gestort word.
Enige toebehore wat met 'n muurprop of 'n battery werk of 'n komponent daarvan is kan herwin word.
• Albertinia: 1 Maart van 09:00 tot 11:00 by die gemeenskapsaal.
• Gouritsmond: 1 Maart van 12:00 tot 14:00 by die gemeenskapsaal.
• Riversdal, Garcia en Vermaaklikheid: 1 Maart van 15:00 tot 18:00 by Jurisch Park.
• Melkhoutfontein: 2 Maart van 09:00 tot 11:00 by die Melkhoutfontein saal.
• Stilbaai: 2 Maart van 12:00 tot 15:00 by die gemeenskapsaal.
• Jongensfontein: 2 Maart van 15:30 tot 17:00.
• Heidelberg: 3 Maart van 09:00 tot 12:00 by die Heidelberg Gemeenskapsaal.
• Witsand: 3 Maart van 13:00 tot 15:00 by die parkeergebied by die munisipaliteit.
• Slangrivier: 3 Maart van 16:00 tot 18:00 by die gemeenskapsaal.
'Ons bring jou die nuutste Hessequa nuus'
