ALBERTINIA NUUS - Die Guinness Wêreldrekordpoging vir die grootste handgebreide trui is in volle swang, met die voorpante wat voltooi is en die moue in wording.

Die projek kry heelwat aftrek in die media en word nou 'n gereelde besoekpunt vir verskeie persone en groepe.

Onlangs het die twaalf finaliste van die Mej Garden Route & Klein Karoo kompetisie kom inloer. Rdl Emor Nel, uitvoerende burgemeester: Hessequa is 'n gereelde besoeker en ondersteun dié toerismeprojek van Albertinia Toerismevereninging volkome. Dennis Joseph, LLP van die Wes-Kaapse Provinsiale Parlement en kiesafdelingshoof van hierdie omgewing is opgewonde oor die inisiatief wat die inwoners aan die dag gelê het en het beloof om op sy volgende besoek aan die dorp sy program so te reël dat hy ook 'n besoek aan die breiprojek kan bring.

Op Erfenisdag, 24 September was die dames op hul pos en terwyl die res van die dorp 'n lekker vakansiedag geniet het, is daar getrou gebrei.

Die dames weet ook hoe om te kuier en Donderdagoggend is daar besluit om op die plaas Klein Paradys te gaan piekniek hou. Rdl Charles Prins het 'n bussie gereël en in samewerking met Fransie Geldenhuys (een van die vennote van die plaas), Connie Dalton (van Beautifull Women) en Nina Matther (projekleier van die breiprojek) is die uitstappie gereël.

Klein Paradys is 'n plaas op die Hectorskraalpad, ongeveer sewe kilometer van die dorp en daar word met Oclivias geboer.

Die meeste van die verskillende kleure van hierdie besonderse plant word hier aangetref, wat tussen vier tot vyf jaar neem om te blom. Dit kom net in Suid-Afrika voor, hoewel dit oor die jare al na die res van die wêreld uitgevoer is.

Die dames het die oggend geniet en 'n insiggewende praatjie deur Koos Geldenhuys oor die Oclivias, het hulle weereens geïnspireer - veral met die wete dat alles wat die moeite werd is, nie altyd maklik kom nie.

Klik hier vir 'n verwante nuusflits.

'Ons bring jou die nuutste Albertinia, Hessequa nuus'