Update
HESSEQUA NUUS - Die nuus oor Elize Blom (54), oudredakteur en joernalis van Suid-Kaap Forum se skielike afsterwe Sondag, 1 Mei om 23:10 het soos skokgolwe deur die Hessequa-streek getrek.
Op sosiale media het boodskappe om simpatie te betuig, ingestroom.
Volgens haar dogter, Janke is haar ma in Februarie met nierkanker gediagnoseer, maar sy het vinnig agteruitgegaan. Elize het twee maande by Janke gebly, maar haar geneesheer het haar by Boland-hospice ingeskryf waar sy oorlede is.
Elize het op 1 Februarie 2004 by die Group Editors-groep aangesluit; eers by Oudtshoorn Courant as joernalis en vanaf ongeveer 2010 by Suid-Kaap Forum.
Sy het op 14 September 2017 by die koerant bedank en het aanvanklik in Bellville gewerk, maar later na Worcester verhuis waar haar pa gebly het.
"Toe hy oorlede is, het ons na Oudtshoorn getrek waar my ma na haar suster omgesien het, tot sy verlede jaar in Augustus, ook aan kanker oorlede is," het Janke gesê.
Buiten Janke laat Elize haar oudste dogter, Lizmar van der Nest, asook haar oudste suster, Alta Grobbelaar na. Die begrafnis vind Saterdag, 21 Mei in Oudtshoorn plaas.
Die redakteur en personeel van Suid-Kaap Forum wens haar dogters, familie en vriende sterkte toe in hierdie hartseer tyd.
Vorige artikel: Oud-redakteur oorlede
'Ons bring jou die nuutste Hessequa nuus'
