HEIDELBERG NUUS - Inwoners van die dorp het Woensdagaand, 25 November tydens 'n polisie Imbizo in die Duivenhoks Gemeenskapsaal hul griewe behoorlik gelug oor hul ontevredenheid met die algemene houding van sekere van die plaaslike polisielede.
Kapt Ashley Moolman, Da Gamaskop streekkantoor, asook Zelda Beukes, Da Gamaskop GPF streeksvoorsitter, het die verrigtinge bygewoon. Die plaaslike polisie is deur maj Jeremy Lewak en kapt EV le Roux verteenwoordig en die plaaslike GPF deur Leon Page, voorsitter. Gavin Riddles, nasionale voorsitter: Gemeenskaps Wet en Orde Stigting van Suid-Afrika het ook die verrigtinge bygewoon. Ao Alroy Windvogel het as fasiliteerder opgetree.
Die meerderheid van die aanwesiges het sekere polisielede, maar veral kapt Mervyn Zana, erg gekritiseer vir hul optrede teenoor die publiek. Vrae is gevra omdat hy weer in sy pos aangestel is nadat hy onlangs op verskeie aanklagte skuldig bevind is in die streekhof op Riversdal.
Zana het tot onlangs op Suurbraak waargeneem, maar is volgens beweringe daar uit sy pos omdat die plaaslike inwoners 'n petisie opgestel het, wat sy oorplasing na Heidelberg meegebring het.
Van die beskuldigings wat gemaak is, is dat verskeie inwoners al glo deur plaaslike lede wreed aangerand en permanente beserings en letsels opgedoen het; brandstigting van Annemarie Warnick se boot in Witsand 'n paar jaar gelede; baie sake, maar veral moordsake is blykbaar nog onopgelos; daar word blykbaar nie opgetree teen 'n bekende boer ten spyte van verskeie klagtes teen hom nie; daar word net in die Oos-Dorp gepatrolleer 'terwyl blanke jeugdiges net so op die drugs is' in die Wes-Dorp en hul wou weet of die polisie 'n 'mafia' in die dorp bedryf. "Daar lê nog 'n man hulpeloos in Riversdal Hospitaal nadat hy deur polisielede aangerand is in die plaaslike polisieselle," het Gelderbloem genoem.
Volgens Shamiel Damons misbruik sekere lede staatsvoertuie om persoonlike sake te doen, soos om drankaankope te doen en varkkos aan te ry. Verskeie persone het gekla omdat hulle lank moet wag nadat hulle gebel het om 'n klag aanhangig te maak. John Paige beweer dat sekere mense se huise deursoek word sonder 'n lasbrief en hulle daarvan beskuldig dat hulle eintlik deel is van 'n Tik-sindikaat in die dorp. Sharon Februarie het gekla omdat die polisie haar seun hardhandig op haar perseel gevisenteer het. Daar word volgens haar ook nie teen sekere mense in haar omtrek opgetree wat glo met Tik handel dryf nie, omdat sekere lede self kliënte is.
Annelene Hartnick, wyksraadslid, het 'n pleidooi vir die handhafing van die 16 Dae van Aktivisme teen geweld teen vroue en kinders gerig. Sy het gevra dat, veral met betrekking tot huismoles, dat programme vir jong polisielede in plek gestel word om hul rol in dié netelige kwessie beter te kan verstaan.
Moolman het gesê dat hy die klagtes sal aanspreek en beloof om terugvoering na die gemeenskap te gee. Hy het ook gevra dat mense klagtes dadelik moet aanmeld en nie wag tot daar weer eendag 'n Imbizo gehou word nie. Lewak het ook die versekering gegee dat hy alle klagtes sal laat ondersoek en wat plaaslik opgelos kan word, sal sy dringende aandag geniet.
Van links voor is maj Jeremy Lewak, Leon Page, Ria van Heerden (GPF sekretaris), Zelda Beukes en Dottie Page. Agter is Mike Pepper, Annelene Hartnick, ao Alroy Windvogel, kapt EV le Roux, Gavin Riddles en kapt Ashley Moolman.
ARTIKEL EN FOTO: CLIVE PRETORIUS
'Ons bring jou die nuutste Heidelberg, Hessequa nuus'
