ALBERTINIA NUUS - 'n Pataloog het bevind dat Henk Oosthuizen (29) wat Sondag, 1 Februarie vermis geraak het naby Bloukrans, heel waarskynlik deur 'n haai aangeval is voor sy verdwyning.
Jaco Pretorius van die Forensiese Patalogiese Dienste op Riversdal het die uitslag aan Suid-Kaap FORUM bevestig. Na Oosthuizen se verdwyning is daar vir drie dae onverpoos na hom gesoek nadat vermoed is dat hy verdrink het. Sy liggaam het Woensdag, 4 Februarie uitgespoel by Sandbaai.
Die plaaslike NSRI, polisieduikers en vlieëniers het deelgeneem aan die soektog. Volgens Pretoriuis was die beserings van so 'n aard dat hy nie die aanval sou oorleef het nie, aangesien daar diep bytmerke aan sy bene en lyf was. DNA het bevestig dat die liggaam wat gevind is wel dié van Oosthuizen is. Sy liggaam is terugbesorg aan sy familie en is hy Saterdag, 21 Maart op die familieplaas Driefontein begrawe.
Hy was werksaam op Somerset-Wes by die Vergelegen Kliniek as apteker. Sy ouers, Tienie en Doreen woon op Albertinia. Hy laat ook 'n broer, Derick (25) en sy meisie, Karin Roos agter.
Daar was reeds twee voorvalle langs die Stilbaai kus waartydens branderplankryers deur haaie aangeval is. Paul Buckley is op 7 Julie 2009 by Jongensbaai aangeval en aan sy been gebyt en Jacques Mostert by Sandbaai. Beide het die aanvalle oorleef nadat die plaaslike NSRI blitsig op die toneel was.
Volgens Rico Menezies van Stilbaai NSRI is daar heelwat meer haaie langs die kus as wat werklik besef word en het hyself al 'n haai opgemerk in die gebied waar Oosthuizen aangeval is.
Klik op die skakels hier onder vir vorige artikels:
- Opvolg: Haai oorsaak van apteker se dood
- Soektog duur voort na vermiste man
- Soektog na vermiste man duur voort
- Opvolg: Man se liggaam spoel uit op strand
- Opvolg: Man se liggaam na drie dae gevind
- Apteker se troosdiens Maandag
Bloukrans, waar die voorval vermoedelik plaasgevind het.
ARTIKEL: LOUISE MOUTON, SUID-KAAP FORUM JOERNALIS.
'Ons bring jou die nuutste Albertinia, Hessequa nuus'
