HEIDELBERG SAKENUUS - Vir die tweede agtereenvolgende jaar het ‘n vrou die Sakepersoon van die Jaar-titel opgeraap.
Die eienaar van Heidelberg Hotel, Cecile Kleynhans, is tydens Heidelberg Besigheids Forum (HBF) se jaarlikse dinee en prysuitdeling Woensdag 1 Maart, onder leiding van Ben Dell (voorsitter) in die stadsaal as vanjaar se Sakepersoon aangewys.
John Evert (voorsitter: Heidelberg Rolbalklub) is as Sportpersoon van die Jaar aangewys. Die wenners van die jaarlikse Tuinbou-kompetisie is ook aangekondig. Hulle is: Beste Groentetuin - Whitey Solomons; Beste Blomtuin - 1. Arina van Zyl; 2. Anel Snyman. Beste Gemeenskapstuin - Jacobus Joseph.
Onder die ongeveer 60 aanwesiges was verskeie plaaslike sakepersone, asook rdl Grant Riddles (uitvoerende burgemeester: Hessequa Munisipaliteit), dr Willie Cilliers (voorsitter: Wes-Kaap Afrikaanse Handels Instituut (AHI/George Sakekamer), Rean Pretorius (voorsitter: Stilbaai Sakekamer) en Richard Shumi (voorsitter: Thembalethu Sakekamer).
Riddles het die sakekamer gelukgewens met hul poging om ekonomiese ontwikkeling te bevorder en hulle van sy, asook die Hessequa Raad se ondersteuning verseker. Volgens hom moet hulle as raad die pad saam met al die sakekamers in die streek stap om die visie te verwesenlik.
"Ons is besig om Riversdal se sakekamer uit te bou."
Cilliers het verwys na die nagenoeg 250 lede van Thembalethu Sakekamer wat grootliks uit informele besighede bestaan. Volgens hom moet gefokus word om 'n inklusiewe ekonomie te vestig, "anders gaan ons nie ons dorpe se ekonomie bevorder nie."
Met verwysing na die hoë werkloosheidsyfer, het hy beklemtoon dat geleenthede veral vir jong entrepreneurs geskep moet word en dat gevestigde sakepersone hul kundigheid met die informele sektor moet deel. "Dit gaan ook nie oor ras nie. Ons sal moet saamwerk as ons ernstig is om ekonomiese groei te verseker."
Carmen Pecoraro (onder-voorsitter: HBF) het 'n dringende beroep op elke lid en potensiële lid se samewerking en bydrae gedoen om alle sakepersone in die dorp te betrek.
"Ek doen namens die HBF 'n beroep op die informele sektor van die dorp, asook Slangrivier en Witsand en alle ander belangstellendes om by ons aan te sluit en deel te neem tot voordeel van ons distrik. "Alleenlik dan sal ons in staat wees om Heidelberg en omgewing behoorlik te kan bemark."
Dell het almal, insluitend hul borge bedank vir hul teenwoordigheid en ondersteuning aan die sakekamer.
Die groep maak deel uit van die wenners, gaste en bestuurslede van die Heidelberg Besigheids Forum wat die dinee verrigtinge bygewoon het. Agter van links staan Ria van Heerden (sekretaris), Jacobus Joseph, Carmen Pecoraro, Anel Snyman, Arina van Zyl, Rean Pretorius, Richard Shumi, Ben Dell, Louise Kluyts (addisionele lid) en Whitey Solomons. Voor: Cecile Kleynhans (Sakepersoon 2016), John Evert (Sportpersoon 2016), rdl Grant Riddles en dr Willie Villiers.
ARTIKEL & FOTO: CLIVE PRETORIUS, SUID-KAAP FORUM-KORRESPONDENT
'Ons bring jou die nuutste Heidelberg, Hessequa nuus'
