SUID-KAAP NUUS - 'n Kulula vliegtuig wat laag oor Santosstrand skeer, Harvards wat deur die lug klief, internasionale vermaaklikheidskunstenaars wat gehore vermaak, koperblasers en Country musiek, motors wat bande skuur tot die rook staan, rieldansers, 'n straatoptog en 'n vuurwerkvertoning sonder weerga, dis maar enkele van die Diasfees hoogtepunte waarna Mosselbaaiers kan uitsien wanneer die fees oor minder as twee weke afskop en dis alles gratis en verniet!
Sonder twyfel is een van die hoogtepunte van die 2015 Diasfees die besoekende, internasionaal befaamde kunsgeselskap van China, Zhejianf Opera Wu, wat met hul draakdanse en akrobatiese toertjies die gehoor na hul asems sal laat snak. Die kunsgeselskap sal vergesel word van die Chinese Konsul-generaal wat met sy afvaardiging ook die fees sal beleef.
Mosselbaaiers moet gerus ook Saterdag, 31 Januarie om 08:45 op die feesterrein wees om die verbyvlug van die Kulula passasierstraler laag oor die strand te beleef.
Hierdie jaar sal die Harvard-vertoning gepaard gaan met meer gedetailleerde kommentaar wat die vlugte nóg meer aanskoulik sal maak, terwyl toeskouers ook op die uitkyk moet wees vir die akrobatiese vlugvertonings van die plaaslike vliegklub en die Westelike Provinsie Akrobatiese vlugvertoonspan.
Die jaarlikse straatparade sal weereens om 09:00 op Saterdag, 31 Januarie vanaf die munisipale kantore via Marsh- en Georgestraat na die feesterrein vertrek. Hierdie jaar word besighede ook genooi om 'n vlot in te skryf en op hierdie wyse handelsmerkbewustheid te kweek terwyl hulle met ander besighede meeding om die beste vlottoekenning.
Verhoogvertonings deur die Indonesiese en Portugese kunsgeselskappe sal interessante danspassies opdis en plaaslike gehore aan die kultuur van daardie lande blootstel. Eweneens sal die Rieldansers van Boesmanskloof met hul vlugvoetigheid en ritmiese danse wat verskillende kampvuurstories uitbeeld, feesgangers vasgenael hou.
Plaaslike en nasionale kunstenaars sal meeding om feesgangers te trek en daar kan uitgesien word na vertonings deur Mosselbaai se eie Gerrie Pretorius, Karin Kortje, wenner van die derde Idols reeks, Karlien van Jaarsveld, David Fourie, Willem Botha en Nadine. Die Gumboot dansers, Mama Afrika dansers en ander optredes sal verseker dat die kultuur van verskeie gemeenskappe op die verhoog tot hul reg kom.
Die jongspan sal vermaak word deur vertonings van die gewilde Lollos, Pepe en Lilly van Liekieland. 'n Teetuin, 'n eerste in 2015, sal vir die droeë kele voorsiening maak. Verhoogvertonings begin om 10:00 op Saterdag, 31 Januarie en hou aan tot om 23:45.
Op Vrydag, 30 Januarie sal die vuurwerkvertoning om 20:00 begin en troeteldiereienaars met sensitiewe troeteldiere is welkom om gratis kruiekalmeermiddels by Santos Express, die borge van die vuurwerkvertoning, af te haal.
Die Diasfees word deur die Mosselbaai Munisipaliteit aangebied om toerisme na die omgewing en die plaaslike ekonomie te bevorder.
'Ons bring jou die nuutste Hessequa nuus'
