HEIDELBERG NUUS - Heidelberg het Saterdag 10 September weereens hul kanse ietwat van 'n knou toegedien om 'n tuishalfeindstryd aan te bied toe hulle vir die tweede week agtereenvolgens 'n onindrukwekkende vertoning gelewer het.
Dié keer was dit in hul laaste tuiswedstryd teen Evergreens toe hulle met 20 - 20 gelykop gespeel het.
Heibi was met rustyd met 14 - 17 agter.
Evergreens, wat nog 'n buitekans het om in die vierde plek op die punteleer in te skuif, het alles probeer om dié hoop lewendig te hou. Die kragmeting was tot aan die einde in die weegskaal en albei spanne het hulle ondersteuners laat naels kou.
In teenstelling met hul vorige wedstryd teen Maori's waar hulle 11 keer agter die doellyn gaan druk het, kon Heibi dié keer net een drie teenoor Evergreens se twee drieë aanteken.
Heibi se drieë is deur Jaques Thyse (haker) en Corbin Swartbooi (heelagter) gedruk. Swartbooi het ook drie strafskoppe oorgeklits en Berthal September, wat hom vervang het, was ook suksesvol met twee strafskoppe.
Evergreens se derdes het Heibi 15 - 11 geklop nadat hulle rustyd met 7 - 3 voor was.
Heibi se tweedes het die bordjies verhang en met 22 - 12 gewen. Heibi se punte is deur Jaydian September (flank) met twee drieë en Carlo Williams (linkervleuel) met vier strafskoppe behaal.
Heibi speel Saterdag 17 September hul laaste ligawedstryd weg teen Bridgton van Oudtshoorn.
Corbin Swartbooi, wakker heelagter van Heidelberg, stuur hier een van sy drie strafskoppe deur die pale.
Eslin Naudt, losskakel van Heidelberg (met bal), probeer deur 'n gaping glip.
Foto's: Heindrich Fortuin
'Ons bring jou die nuutste Heidelberg, Hessequa nuus'
