SUID-KAAP NUUS - Goed, maar nie goed genoeg om die Goue Leeus te klop nie.
Die SWD Arende is verlede Saterdag in Johannesburg in die kwarteindronde van vanjaar se Vodacombeker-reeks deur die Goue Leeus met 29-21 uitgeskakel.
Marnitz Boshoff, Bok-losskakel van die Leeus, het 19 punte aangeteken en die Arende feitlik eiehandig gekelder.
Vrydagaand pak die Leeus die Pumas in Johannesburg en die Westelike Provinsie kom in Kaapstad teen die Blou Bulle te staan in die half-eindronde wedstryde.
Bevin Fortuin, afrigter van die Arende, het aan die George Herald gesê hoewel hy baie teleurgesteld is oor die uitslag, glo hy tog sy span was goed genoeg om die Leeus te verras.
"Ons het nie ons kanse gebruik nie en die ouens se besluitneming was nie na wense nie. Ons gaan nou vir 'n paar dae rus en dan gaan ons hard werk om gereed te wees vir die kwalifiserende ronde van die Curriebeker wat op Vrydagaand 12 Junie om 19:00 teen die Luiperds op Outeniquapark afskop."
Mens kan die Arende se Vodacombeker-seisoen seker in die goeies en slegtes opdeel. En, grimmig, soos hul vierde plek op die punteleer ook al lyk, is daar tog hoop vir die Arende vir die Curriebeker-seisoen wat nou voorlê.
'n Paar positiewe dinge omtrent hul veldtog was:
- Die voorspelers was meesal bielies, veral in die eerste fases, Die grondslag van meeste van hul oorwinnings is hier gelê. Maar teen die topspanne kon hulle nie 'n deurslaggewende greep kry en hul teenstanders stadigaan tot oorgawe dwing nie.
- 'n Hele paar jonger spelers - veral dié wat uit die SWD-klubs getrek is - het nou 'n goeie proesel van senior rugby gekry en waardevolle ondervinding opgedoen. Hou maar spelers soos Janneman Stander, Kirsten Heyns. Luzuko Vulundli en Marius Fourie vorentoe dop.
- En die ouer hande soos Elric van Vuuren, Martin du Toit. Alshuan Bock, en natuurlik Schalk Oelofse, het telkens hul waarde vir die Arende bewys, veral in die knyptang-situasies.
Die negatiewe is:
- Swak besluitneming en verbroude skoppe pale toe het die Arende duur te staan gekom. Tog het hulle bewys dat hulle mededingend op dié vlak is al speel hulle die dag vrot.
- Die verdedigingspatroon het soms uitge-rafel en was nie altyd op standaard nie.
ARTIKEL: HUGO REDELINGHUYS, GEORGE HERALD SPORT REDAKTEUR.
'Ons bring jou die nuutste Tuinroete, Klein-Karoo, Hessequa nuus'
