SUID-KAAP NUUS - Volgens die department water en sanitasie se damvlaklesings toon damme in die Suid-Kaap geen styging in watervlakke vir die tydperk Maandag 5 Junie tot Maandag 12 Junie nie. Damme loop leeg en waterbeperkings wat ingestel word, toon die situasie is kritiek.
Van die 16 damme in die omgewing, toon 5 Junie en 12 Junie se lesings dat die watervlakke van ses damme konstant gebly het, met die Gamka- (Beaufort-Wes) en Gamkapoortdamme (Ladismith) wat dolleeg is. Die Mellvilledam (Oudtshoorn) is steeds 100% vol.
Die agt ander damme toon almal laer watervlakke.
Midde in die brandgeteisterde gebiede het die Akkerkloofdam (Knysna) se watervlak met 3% van 36% na 33% gedaal, terwyl George se Tuinroetedam (algemeen bekend as die Garden Route Dam) 2,78% minder (van 59% na 56,22%) water toon.
Die Floriskraaldam (Laingsburg: 4,2%), Kammanassiedam (Oudtshoorn: 6%) en Stompdriftdam (De Rust: 5,6%) laat rede tot kommer en hoop op reën, om dit van dolleeg-status te red.
Die gemiddelde persentasiesyfer van damvlakke in die Wes-Kaap het in die gemelde tydperk ‘n 1,8% styging getoon.
Drie Wes-Kaapse damme wat dié persentasiesyfer opgejaag het, is die Bulshoekdam in die Sederberg Wildernis-natuurreservaat (10,2% meer water – van 31,6% na 41,8%), die Stettynsdam in die Theewaterskloof-natuurreservaat (15,1% meer water - 31,9% na 47%) en die Misverstanddam in die Groot Wintershoek Wildernis-omgewing (14,1% meer water – 80,7% na 94,8%).
- Akkerkloofdam (Knysna): 33% / 36%
- Calitzdorpdam (Calitzdorp): 28,2% / 28,2%
- Duiwenshokdam (Heidelberg): 58% / 59.7%
- Ernest Robertsondam (Jonkersberg): 38,4% / 38,4%
- Floriskraaldam (Laingsburg): 4,2% / 4,3%
- Gamkadam (Beaufort-Wes): 0% / 0%
- Gamkapoortdam (Ladismith): 0% / 0%
- Hartbeeskuildam (Hartenbos): 22,3% / 23%
- Koos Raubenheimerdam (Oudtshoorn): 54% / 55%
- Kammanasiedam (Oudtshoorn): 6% / 6%
- Oukloofdam (Prins Albert): 13,6% / 14,8%
- Mellvilledam (Oudtshoorn): 100% / 100%
- Roodefonteindam (Plettenbergbaai): 57,3% / 58,9%
- Stompdriftdam (De Rust): 5,6% / 6,2%
- Tuinroetedam (George): 56,22% / 59%
- Wolwedansdam (Groot-Brakrivier): 79,9% / 80,8%
ARTIKEL: CHRISTO VERMAAK, OUDTSHOORN COURANT-JOERNALIS
'Ons bring jou die nuutste Klein Karoo, Hessequa, Tuinroete nuus'
