STILBAAI NUUS - Die onlangse haai-aanval by Morrispunt se gewilde branderplankgebied het weer die fokus geplaas op die haai noodkissies wat opgerig is deur die plaaslike NSRI.
Alan Byrd, eienaar van die Lapskuit Kiosk het Donderdagoggend, 29 Oktober 'n donasie oorhandig aan Rico Menezies, stasiebevelvoerder van Stilbaai NSRI om 'n kissie te hervul. Vier haai aanval noodkissies is op strategiese plekke langs die plaaslike kuslyn opgerig nadat twee branderplankryers in twee voorvalle deur 'n haai aangeval is op Jongensfontein.
Intussen word die kissies gereeld gevandaliseer tot frustrasie van die plaaslike NSRI. Dit bevat mediese toerusting om toe te sien dat 'n haai slagoffer die nodige mediese behandeling kry, asook om gestabiliseer te word op die toneel.
Volgens hom is dit bitter jammer dat dit voortdurend geplunder word. Dit kos ongeveer R900 om 'n noodkissie met die nodige mediese benodigdhede op te vul. Die inhoud word spesiaal verpak in Kaapstad en is spesifiek bedoel vir 'n haai aanval.
Die afgelope week se voorval toe Stuart Anderson ook deur 'n groot witdoodshaai aangeval is, het weer die klem op die noodsaaklikheid van die kissies geplaas. Gelukkig is die kissie by Morrispunt se branderplankgebied onlangs gevul en het waarskynlik bygedra tot Anderson se oorlewing na die aanval.
Byrd is die soveelste borg vir die noodsaaklike kissies en noem Menezies dat hy tans besig is om 'n surplus op te bou sodat hul altyd die kissies kan vul indien nodig. "Skenkings is altyd welkom." Hy kan gekontak word by 082 855 9460.
Klik hier vir verwante artikels:
- Haai kissie weer gevandaliseer
- 4de noodkissie gevandaliseer
- Opvolg:Noodkissie gevandaliseer
- Nog 'n noodkissie gevandaliseer
ARTIKEL: LOUISE MOUTON, SUID-KAAP FORUM - JOERNALIS
'Ons bring jou die nuutste Stilbaai, Hessequa nuus'
