RIVERSDAL NUUS - Die toestand van die nuwe begraafplaas langs die N2 word bevraagteken.
Die koerant het 'n e-pos met foto's ontvang vanaf 'n leser. Daarin word genoem dat dit skandelik is hoe die begraafplaas lyk en is daar bokke wat oral tussen die grafte loop en vreet, selfs blomme wat op grafte geplaas is. Die vraag word gestel: "Wonder wat ons plaaslike munisipaliteit aan dit gaan doen, dit is vir ons wat blomme op geliefdes se grafte sit 'n bitter pil om te sluk".
Suid-Kaap FORUM het reeds by verskeie geleenthede berig oor die toestand van die begraafplaas langs die N2. Intussen is dit vergroot en duur vandalisme van grafte voort. Met besoek aan die twee begraafplase Dinsdagoggend, 13 Januarie was die toestand van die ou begraafplaas skokkend, kommerwekkend en hartseer.
Buiten dat heelwat grafte geskend, grafstene gebreek en rondgestrooi lê is dit ook duidelik uit vullis en leë drankbottels wat tussen die grafte lê dat die gebied gebruik word vir 'n kuier-en drinkplek. Dit laat die vraag ontstaan of respek vir die laaste plek van rus en eerbetoon aan gestorwes ontbreek. Dat grafkopstukke doelloos en sonder rede platgestoot en gebreek word is 'n erge kommer.
Met vorige navrae oor die kwessie by wie die verantwoordelikheid lê, asook die instandhouding daarvan het Hessequa Munisipaliteit geantwoord dat die munisipaliteit enige struik, plant, blom, lower of versperring snoei, afkap, opgrawe of verwyder indien dit onooglik, beskadig of verlep is as deel van normale instandhouding.
Die versorging en onderhoud van 'n graf is egter die verantwoordelikheid van die betrokke gestorwe persoon se naasbestaandes. Ou begraafplase is voorheen deur die verskillende kerke direk hanteer en bestuur aangesien begraafplase in die verlede in kerkhowe opgedeel was.
Hessequa het wel beklemtoon dat vandalisme en beskadiging van grafstene betreur word. Hessequa wetstoepassers patroleer wel gereeld begraafplase om persone wat doelloos vertoef aan te spreek.
Die nuwe begraafplaas wat langs Kwanokuthula geleë is, is baie netjies en versorg. Geen grafskending of rommelstrooi is opgemerk nie, maar is die klagte van die leser en foto's wel deurgegee aan die munisipale bestuurder van Hessequa Munisipaliteit, Johan Jacobs.
Munisipale kommentaar
Susan Geldenhuys, Hessequa media beampte noem dat ingevolge die Begraafplase en Krematorium verordening dat Hessequa vir algemene instandhouding verantwoordelik is van begraafplase.
"Dit is verbode om 'n dier in die begraafplaas in te bring of toe te laat om daar te dwaal, enige vullis, klippe, grond of afval agter te laat of om enige deel van die begraafplaas te skaad of enigiets daarin te skend of te beskadig. Geen alkohol word toegelaat nie of om te oornag in 'n begraafplaas nie." Die optredes is strafbaar met 'n boete ingevolge die munisipaliteit se boetelys.
Volgens Geldenhuys sal enige persoon wat betrap word wat die verordening oortree daarvolgens 'n boete opgelê word. "Die bokke of rondloperdiere kan ook in terme van die verordening insake die skut van diere opgetel word".
Vandalism of the old cemetery in Riversdale situated next to the N2 is not only sad, but also a concern for residents and families of the deceased buried here. Apart from headstones and graves being vandalised empty liquor bottles are strewn on and beside graves. According to Municipal Bylaws any person desecrating a grave, littering or sleeping in a cemetery can be fined. The upkeep of a grave is the responsibility of the family of the deceased. Hessequa Municipality is only responsible for general upkeep of cemeteries.
Talle grafte se grafstene is omgestamp en gebreek.
Skade aan grafte en rommel in die Riversdal-begraafplaas.
ARTIKEL EN FOTO'S: LOUISE MOUTON, SUID-KAAP FORUM-JOERNALIS
'Ons bring jou die nuutste Riversdal, Hessequa nuus'
