HEIDELBERG NUUS - 'n Klompie ontevrede inwoners het vroeër die maand op 3 Mei buite die plaaslike landdroshof met plakkate betoog oor beweerde knoeiery.
Volgens die onteveredenes is daar baie ongerymdhede by die hof wat onder die mat gevee word. James Gelderbloem (plaaslike wyksraadslid) wat voorheen as sekuriteitswag by die hof gewerk het, vertel dat dié ongerymdhede blykbaar al 'n lang pad aankom.
"'n Beampte wat van die ongerymdhede uitgewys het, is na George verplaas," het hy gesê. Verder word beweer dat eise ingedien was vir persone wat as staatsgetuies moes getuig en dan nooit die gelde ontvang het vir hul vervoerkostes nie.
Ander beweringe sluit in dat die amptelike staatsvoertuig as taxi gebruik word om familie en vriende te vervoer, asook dat voorkeur gegee word aan sekere blanke misdadigers wanneer hulle gearresteer word. "Daar word dan haastig gereël dat hof na ure gehou word sodat hulle borg kan kry," sê hy. Nog 'n aantyging is dat daar ook by die plaaslike polisie baie ongerymdhede plaasvind.
Suid-Kaap Forum se korrespondent het navrae aan beide adv Hishaam Mohammed (Wes-Kaap streekshoof: Departement Justisie) en Moegamat Cerfonteyn (Suid-Kaap areabestuurder) gerig, maar tot op hede geen terugvoering ontvang nie.
Hy is wel telefonies meegedeel dat Mohammed met siekverlof is en dat die waarnemende hoof skriftelike kommentaar sou gee, wat nie ontvang is nie.
Gelderbloem en die groep ontevredenes is egter vasberade om die beweerde ongerymdhede te laat ondersoek.
• Elize Blom, joernalis by die koerant het Dinsdag 18 April by Mariette Jonck (hofbestuurder: Riversdal Landdroskantoor) gaan aanklop vir hulp met verwysing na die regte persoon vir kommentaar. 'n E-pos navraag is aan Happy Mezaco van die Departement van Justisie, Wes-Kaap gestuur, maar die e-pos is geblokkeer.
'n E-pos navraag is ook aan lt kol Jeremy Lewack (stasiebevelvoerder: Heidelberg Polisie) gestuur, maar teen spertyd is geen terugvoering ontvang nie. Tydens 'n telefoniese oproep deur Wilma Adamson (redakteur) het Lewack egter gesê dat hy geen e-pos rakende die bewerings ontvang het nie.
"Ek dra geen kennis van enige ongerymdhede by die polisiestasie nie en was ook nie bewus van die betoging by die landdroskantoor nie. Persone wat ongelukkig is oor enigiets by die stasie, is welkom om my te kontak," het hy gevra.
Die koerant was in kontak met Rodney Isaacs (waarnemende streekshoof: Departement van Justisie) waarna hy op 25 April bevestig het dat hy so spoedig moontlik sal terugvoer gee.
Dit is Vrydag 5 Mei weer met Isaacs opgevolg, maar teen spertyd is steeds geen terugvoer ontvang nie.
Klik hier vir vorige artikels:
- Opvolg: Inwoners in opstand teen polisie
- Heidelberg-polisieman aangekla van moord
- Opvolg: Polisielid in hof vir moord
- Opvolg: Polisielid aangekla van moord
- Vermiste vrou dood gevind
- Jong vrou verdwyn spoorloos
ARTIKEL & FOTO: CLIVE PRETORIUS, SUID-KAAP FORUM-KORRESPONDENT
'Ons bring jou die nuutste Heidelberg, Hessequa nuus'
