RIVERSDAL NUUS - Hessequa-munisipaliteit het weereens sy plek as een van die bes bestuurde munisipaliteite in die land bevestig met die bekendmaking van 'n skoon ouditverslag vir die 2024/25-finansiële jaar wat deur die Ouditeur-Generaal op 30 November aangekondig is.
Dit is die 12de agtereenvolgende skoon oudit - 'n uitsonderlike prestasie wat trots en hoop in die gemeenskap laat opvlam.
Hessequa-burgemeester, Grant Riddles, beskryf die prestasie as 'n "belangrike mylpaal" wat die munisipaliteit se verbintenis tot deursigtigheid, finansiële dissipline en doeltreffende bestuur onderstreep.
Hy beklemtoon dat sterk samewerking tussen die politieke en administratiewe leierskap 'n sleutelrol gespeel het.
Die skoon oudit bevestig dat Hessequa oor robuuste finansiële bestuur, gesonde interne kontroles, pligsgetroue verkrygingsprosesse en geloofwaardige begrotingspraktyke beskik.
Dit beteken dat hulpbronne effektief aangewend word om die doelwitte van die Geïntegreerde Ontwikkelingsplan (GOP) te bereik - en uiteindelik beter dienslewering aan inwoners te verseker.
Hierdie skoon ouditmening is 'n bewys van:
• Robuuste finansiële bestuur
• Gesonde interne beheermaatreëls
• Pligsgetroue verkrygingspraktyke
• Geloofwaardige begrotingsprosesse
"Ek betuig my opregte dank aan die raad, die munisipale bestuurder en sy span direkteure, asook elke amptenaar vir hul harde werk en toewyding.
Hierdie prestasie is 'n bewys van sterk leierskap en onwrikbare verbintenis tot goeie finansiële bestuur. Ons is trots om hierdie standaard jaar na jaar te handhaaf," het Riddles gesê.
‘Ons bring jou die nuutste Tuinroete, Hessequa, Karoo nuus’
