STILBAAI NUUS - Daar het 'n tasbare opgewondenheid in die vierkant by Laerskool Bertie Barnard gehang toe die skool en leerders afskeid geneem het van die gr. 7-leerders.
Die ouers was ook teenwoordig en van die mammas se oë was maar natterig. Vir party ouers was dit ook 'n afskeid van Bertie Barnard, maar ander sal volgende jaar weer terug wees.
Sommige leerders is al sedert hulle kleuterskool dae by Pikkewouter saam, maar volgende jaar is die keuse Hoër Landbouskool Oakdale of Hoërskool Langenhoven, beide in Riversdal en sowat 40 km van Stilbaai af.
Elke leerder het 'n Bybel en 'n sertifikaat ontvang, asook 'n spesiale paar sokkies.
Shaun Doubell, onderhoof van Bertie Barnard het in sy boodskap aan hulle gesê dat daar net twee goed is wat hulle met hulle moet saamneem.
Eerstens: "Maak die regte keuse," en tweedens " Bly naby jou Skepper en bly by die Woord."
‘Ons bring jou die nuutste Tuinroete, Hessequa, Karoo nuus’
