HESSEQUA NUUS - Die feesseisoen is weer op hande en Adneshel Voss, Hoof: Beskermingsdienste vra die gemeenskap se samewerking om dit vir almal 'n aangename en veilige tydjie te maak.
Hy deel die volgende belangrike sake:
Verkeerskantoor
- Indien jy op 'n ongeluk op enige nasionale pad afkom, rapporteer dit onmiddellik aan die verkeersdepartement en nooddienste.
Kyk uit vir die blou tekens teen die pad wat jou sal help om jou ligging aan die nooddienste aan te dui.
- Bly kalm en praat duidelik. Gee jou naam en nommer en die ligging van die ongeluk.
Dui aan hoeveel voertuie betrokke was, hoeveel persone beseer is en of jy kan sien of iemand vasgepen is. sodat die nodige noodvoertuie uitgestuur kan word.
- Verkeers- en polisiedienste sal streng optree en 'n zero tolerance benadering toon ten opsigte van dronk en roekelose bestuurders.
- Die verkeerskantore sal gesluit wees vanaf 24 Desember tot 2 Januarie.
Maak seker dat motorvoertuig- en bestuurderslisensies op datum is.
Informele handelaars en smouse moet hou by die permitvoorwaardes.
Daar sal streng opgetree word teen diegene wat nie oor 'n geldige permit beskik nie. Die permit wat aan 'n persoon uitgereik word mag nie onderverhuur word nie.
Voorts moet 'n permit vir elke dorp waar daar gesmous word, uitgeneem word. Daar kan beslag gelê word op die voertuig en voorraad indien nodig.
- Navrae aangaande die verskillende soorte permitte, asook die uitneem daarvan kan gerig word aan die Departement Gemeenskapsdienste op Riversdal by 028 713 8015. Klagtes oor smouse wat nie permitvoorwaardes nakom of vermoedelik nie 'n permit het nie, kan by die wetstoepassers aangemeld word.
Baie besoekers kom besoek die streek met hul huisdiere.
Hessequa is ook bevoorreg om oor ses Blouvlagstrande te beskik en is daar baie strenger reëls wanneer die strande besoek word. Indien jy met jou hond wil gaan loop of draf moet die hond ten alle tye op 'n leiband wees. Indien jy weggaan, maak seker dat jou hond kos en water het en iemand wat na die dier kan omsien.
Moet ook nie jou hond in jou voertuig laat nie, veral op warm dae, want dit is gewoonlik warmer in die voertuig as buite.
- Brande- en Verkeersvoorvalle - 084 014 18 28.
- Skut van diere - 082 4430 390 of 028 713 7817.
'Ons bring jou die nuutste Hessequa nuus'
