HESSEQUA NUUS - Gesinsgeweld en mishandeling is 'n harde realiteit vir baie vroue en kinders.
Die jaarlikse 16 Dae van aktivisme teen geweld teen vroue en kinders vind plaas vanaf Woensdag, 25 November tot Donderdag, 10 Desember. Die regte van vroue en kinders in Suid-Afrika is in die Nasionale Grondwet vervat en daardeur beskerm.
Geweld teen vroue en kinders is 'n ernstige en kommerwekkende probleem in Suid-Afrika. Dit kom al meer voor in Wes-Kaapse gemeeskappe waar alkohol en dwelms erg misbruik word.
Hierdie tipe geweld kan verskeie vorme aanneem, onder andere fisiese, emosionele en finansiële mishandeling, seksuele aanranding en verkragting.
Mishandeling in enige van hierdie vorme skend menswaardigheid. 16 Dae van Aktivisme teen Geweld teen Vroue en Kinders is 'n internasionale bewusmakingsveldtog, wat ook fokus op die negatiewe impak van hierdie tipe euwel op die samelewing.
- 70 Persent vrouens het al 'n mate van fisiese- en/of seksuele geweld in hul leeftyd ervaar, meestal deur 'n persoon waarmee hulle 'n intieme verhouding het.
- In Suid-Afrika word 'n vrou elke ses uur deur 'n lewensmaat vermoor.
- 603 Miljoen vrouens leef vandag steeds in lande waar gesinsgeweld nog nie as 'n misdaad beskou word nie.
- Meer as 700 miljoen vrouens wat vandag leef, was getroud voor die ouderdom van 18 en meer as een uit drie vrouens voor die ouderdom van 15.
- Navorsing uit Afrika-lande, insluitend Suid-Afrika, het bevind dat vrouens wat slagoffers van geweld is 'n hoër risiko het om met MIV besmet te word.
- 80 Persent slagoffers van mensehandel is vrouens en kinders.
- Die risiko vir vrouens tussen 15 en 44 jaar is groter om verkrag te word of 'n slagoffer van gesinsgeweld te wees as wat dit is om met kanker of malaria gediagnoseer te word, 'n oorlog te beleef of selfs in 'n motorongeluk te wees.
Die hoofdoel van die veldtog is dus bewusmaking rakende geweld teen vrouens en kinders in die samelewing en die erns van die kwessie. Verder poog dit om die verskeie vorme van geweld te indentifiseer en te fokus op die negatiewe impak wat dit op kwesbare groepe het.
Die veldtog fokus ook op die positiewe rol wat mans en seuns in hul gemeenskappe, huise en werksplekke kan speel om hierdie tipe geweld te voorkom.
Kontaknommers om te onthou
Stop Geslagsgeweld - 0800 150 150
Kinderlyn - 0800 055 555
Men as Partners-projek - 011 833 0504
Nasionale Netwerk oor Geweld teen Vroue
- 012 321 4959
Lawyers for Human Rights - 011 339 1960
Suid-Afrikaanse Polisiediens -10111
'Ons bring jou die nuutste Hessequa nuus'
