OUDTSHOORN NUUS - Die 70-jarige Colin Glanville King van Swellendam, wat Maandag vermoedelik sy eie lewe op die Calitzdorp-pad geneem het, se dogter Gina Barker, het Woensdag sy liggaam uitgeken nadat die Oudtshoorn Courant op sosiale media gevra het dat naasbestaandes die polisie moet kontak.
Kapt. Louis Visser, woordvoerder van die Oudtshoorn-polisie, het gesê die man se liggaam is Maandag deur 'n motoris by 'n aftrekplek 10 km buite Oudtshoorn gevind.
"Hy is met 'n koeëlwond in sy kop gevind en daar is ook 'n rewolwer op die toneel gekry," het hy gesê.
Die bewering is dat hy met sy motorfiets in die rigting van Oudtshoorn gery het, by die aftrekplek gestop en 'n botteltjie koeldrank gedrink het, waarna hy homself geskiet het.
Volgens Visser het King 'n kluisenaars bestaan gevoer.
Met die aankoms van die Oudtshoorn Courant op die toneel was die polisie reeds daar.
'n Persoon wat naby die toneel woon het aan die Oudtshoorn Courant vertel hy het gesien hoe die motorfietsryer by die aftrekplek stilhou.
"Ek het agter die huis gesit en daar kan mens al die voertuie sien wat verbyry. Ek het gesien die man stop. Dit was seker so vyftien minute later toe ek die skoot hoor.
Ek het vir my vrou gesê dit is seker iemand wat die voëls skiet, maar toe ek mooi kyk toe sien ek nie meer die man daar staan nie. 'n Man met 'n silwer kar wat verbygery het, het op sy liggaam afgekom en die polisie gebel," het hy vertel.
King se identiteit kon nie dadelik bekend gemaak word nie, maar is Dinsdag deur die polisie aan die Oudtshoorn Courant bevestig omdat sy familie nie opgespoor kon word nie. Sy suster het binne drie ure die ondersoekbeampte geskakel na die naam bekend gemaak is.
Klik hier vir vorige artikels:
- Motorfietsryer skiet glo homself
- Skietvoorval: Motorfietsryer se identiteit bekend
- Opvolg: Man dood in skietvoorval
- Motorfietsryer sterf in skietvoorval
ARTIKEL & FOTO: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
