HESSEQUA NUUS - Suid-Kaap FORUM het met 'n paar mense vanuit dié streek afkomstig wat in Frankryk woon en werk gesels na aanleiding van die terreuraanvalle in Parys Vrydagaand, 13 November.
Minstens 127 mense het hul lewens verloor en meer as 200 is beseer, waaronder 80 ernstig. Beelde rondom dié sinnelose gebeure flits sedertdien op televisieskerms en laat die vraag ontstaan of dinge gou weer, indien ooit na normaal sal terugkeer.
Meyer Bosman, oud-Riversdaller is losskakel vir die privaatklub Stade Fraincais in die suide van Parys. "Daar is nou 'n gevoel van vasberandenheid in die stad. Die Franse glo in 'liberty' en sal nie dat dié gebeure hul vryheid aantas nie. Daar is egter wel ook 'n onderliggende gevoel van vrees.
Die plekke wat aangeval is, is 'local spots'. Die manier hoe dit gedoen is, is ysingwekkend - dit vat een of twee mense met 'n geweer en 'n bom om so iets te doen - dit maak mens versigtig en bang." Hy voeg egter by dat as Suid-Afrikaners ken ons nie terreur-aanvalle nie, maar lewe ons daagliks met baie meer misdaad saam as mense in Europa.
"Ons is baie meer blootgestel aan geweld, maar het dit mens wel erg geskok, veral omdat dit so sinneloos is."
Jacques Barkhuizen van Stilbaai wat in diens is van die Franse Vreemdelinge Legioen (French Foreign Legion) in Castelnaudary by die 4ème regiment etranger vertel dat daar reeds meer as 3 000 soldate in die stad ontplooi is. Tans wag hulle op instruksies waar die legioen ontplooi gaan word - die Franse Legioen word grotendeels vir buitelandse operasies gebruik. Hy weet egter nie wat om te verwag nie. Die atmosfeer is volgens hom baie stram.
"Die situasie is nog baie teer en is die strate vol soldate en polisie wat patrollie doen, veral op treinstasies. Meeste mense is baie somber en nog in erge skok."
Madri du Preez, afkomstig van Heidelberg woon in Bordeaux en vertel dat die impak van die aanvalle landswyd strek, ook in die rustige Franse platteland. "Almal is in skok oor die tragiese gebeure in hul mooie land. Ons kan ook sien dat mense oral om ons bang is." Op die platteland is die strate stiller en die winkels leeg, vertel sy.
"Na ons die ISIS video gesien het waar hulle volgelinge aanmoedig om enige Franse persoon, enige plek te vermoor, het ons besef enigiets kan enige dag gebeur. Dit maak ons senuagtig. Vir tyd en wyl sal ons net normaal voortgaan met ons daaglikse roetine en bid vir genade dat hierdie wreedheid tot 'n einde kom."
Regoor Europa is daar Maandag, 16 November om 12:00 tien minute stilte gehou. Antoinette Klein gesels uit Pole: "Vanoggend, met Poolse stiptelikheid, gaan hier om 12:00 'n alarm af soos destyds toe bomaanval-waarskuwings uitgebasuin was. Dit was hoendervleis vreesaanjaend.
Waarheen van hier? Ons sit op die tweede vloer van 'n 10-verdieping gebou sonder kelder of bomskuiling. Maar net daarna, toe beier die kerkklokke vanuit alle oorde. Rondom ons is omtrent vyf kerke en katedrale en die deurmekaar klanke was so vertroostend - dit het 'n mens tot 'n stomstilte gedwing uit dankbaarheid dat jy lewe. Net dit. Niks anders meer nie."
Wat ons weet.
Die Islamitiese Staat (IS) het Saterdagmiddag, 14 November in 'n verklaring aanspreeklikheid vir die aanvalle van 13 November in Parys aanvaar.
'n Noodtoestand is intussen deur die Franse regering afgekonding en die land se grense gesluit. Ses gebiede in Parys is geteiken. Daar was Vrydagaand drie afsonderlike bomontploffings buite die Stade de France waar Frankryk teen Duitsland in 'n vriendskaplike wedstryd sokker gespeel het. Francois Hollande, Frankryk se president, het ook die wedstryd bygewoon, maar is teen halftyd ontruim.
Twee aanvallers het ook met AK47-masjiengewere op konsertgangers by die Bataclan-konsertsaal losgebrand. Minstens 80 konsertgangers is doodgeskiet. Rue Bichat en Rue de Charonne is ook geteiken.
ARTIKEL: LOUISE MOUTON, SUID-KAAP FORUM - JOERNALIS
'Ons bring jou die nuutste Hessequa nuus'
