ALBERTINIA NUUS - Die voorgenome proklamasie van die pad vanaf die N2 oor die treinspoor na Theronsville het nie almal se ondersteuning nie.
Rdl Fred Carelse van die Civic Independent wat deel vorm van die DA-koalisie was Dinsdagoggend, 30 Junie by Suid-Kaap FORUM om die koalisie se saak te stel, aangsien hulle van mening is dat hul nie om kommentaar genader is nie.
"Die Civic Independent en Cope partye kan nie die proklamasie of petisie ondersteun nie." Volgens Carelse is hul meer bekommerd oor die 749 huise in die hele woonbuurt waar modderstrate 'n algemene gesig is.
"Theronsville is bekend vir die modderige en kleigrond en is dit meer belangrik dat die woonbuurt se strate geteer of plavei word as om 'n onwettige pad te laat bou."
Hy het verder genoem dat die hele saak nie gedryf word deur die gemeenskap nie omdat almal beslis nie te vinde daarvoor is nie. "Ek moes Maandagaand, 29 Junie omtrent bontstaan om vrae hieroor te beantwoord." Carelse het die kwessie ook onder die president van die Civic Independent, pastoor Nicolin Crouwcamp se aandag gebring.
Volgens die vorige berig hieroor het heelwat motoriste die DA-petisie onderteken, aangesien die pad op 'n daaglikse basies gebruik word.
Die pad sal as tweede toegang dien tot Albertinia vanaf die N2. Die Hessequa Raad het die versoek om die proklamasie toegestaan en is die verkeersimpakstudie ook afgehandel.
Daar is ook begroot vir die formalisering van hierdie toegangsroete. Carelse hou egter voet by stuk dat die koalsie nie die pad kan ondersteun tot al die strate in Theronsville geteer of plavei is nie.
"Dit is prioriteit vir ons, want dit gaan oor ons mense wat daagliks met die probleme sit."
Vorige artikels:
ARTIKEL: LOUISE MOUTON, SUID-KAAP FORUM JOERNALIS.
'Ons bring jou die nuutste Albertinia, Hessequa nuus'
