HESSEQUA NUUS - Ken jy jou regte as verbruiker? Sedert die Verbruikerswet in April 2011 in werking getree het, het verbruikers 'n beter voet om op te staan.
Op 15 Maart word Internasionale Verbrui-kersregte dag herdenk, maar weet jy wat die wet werklik beteken en hoe jy te werk moet gaan om 'n klagte in te dien?
Kortliks kan die wet saamgevat word dat elke kliënt die reg het op gelykheid in die verbruikersmark, die reg op privaatheid en beskerming teen diskriminerende bemarking.
Die kantoor van die Verbruikers Beskermer (VB) is hoofsaaklik gestig as 'n provinsiale verbruikersbeskermings-agentskap wat daarop gemik is om toegang, inligting, opvoeding en regstelling daar te stel vir verbruikers binne die provinsie, wat moontlik verbruikersverwante dispute mag hê.
Dit bestaan uit sub-direktorate: Klagte bestuur, verbruiker opvoeding en bemarking, asook die verbruikerstribunaal.
Die kantoor voer sy mandaat uit om op te tree as 'n verbruikersbeskermings-agentskap met die doel om 'n regverdige, doeltreffende en deursigtige arena te skep vir verbruikers, besighede, asook ekonomiese burgers, insluitende kleinsake.
Die VB se kantoor dien as aanklaer namens verbruikers by die Verbruikers Tribunaal om sodoende verbruikers se klagtes te besleg en is dit 'n spesiale hof spesifiek vir die doel.
Met verbruiker verwante navrae word die volgende stappe aanbeveel om dit op te los:
* Keer terug na die besigheid en kyk of jy dit nie self kan uitklaar nie. Identifiseer jou probleem en staaf dit met bewyse soos byvoorbeeld die beskadigde item, die kontrak of kwitansie.
* Bewaar die oorspronklike dokumente en werk waar nodig met afskrifte.
* Wees duidelik oor hoe jy jou klagte opgelos wil hê en probeer eers om dit direk uit te klaar met die persoon verandwoordelik soos die winkelbestuurder of verbruiker verteenwoordiger.
* Hou notas van die stappe wat jy geneem het om jou klagte aan te spreek asook met wie jy gepraat het en op watter datum die gesprek(ke) plaasgevind het.
* Maak 'n daadwerklike poging om die dispuut self uit te klaar, maar indien dit nie werk nie, kontak die kantoor van die Verbruikers Beskermer.
Verbruiker Beskermer
kontakbesonderhede: Kontak die kantoor tolvry by 0800 007 081 of stuur 'n faks na 021 483 5872 of per e-pos na consumer.Protector@westerncape.gov.za
'Ons bring jou die nuutste Hessequa nuus'
