STILBAAI NUUS - Jan Volschenk, 'n onderwyser by Laerskool Bertie Barnard in Stilbaai het 'n passie vir vaderskap en hy het ook 'n skryftalent.

Jan en Zoli se dogtertjie, Cherize, was amper 'n jaar oud toe sy in hulle swembad geval en byna verdrink het.

Hierdie traumatiese gebeurtenis het hom laat besef hoe kort en kosbaar die lewe eintlik is. Dit het sy oë oopgemaak vir die kosbaarheid van elke oomblik en die noodsaaklikheid om elke dag met oorgawe te leef.

Hy het vasbeslote geraak om die beste man vir sy vrou te wees en die beste pa vir sy kinders. Dit het hom laat besluit om die boek, Fearless Fathers, te skryf met die hoop dat dit ander vaders kan bemoedig en aanmoedig om die Bybel te ondersoek en die riglyne van God vir vaderskap te omarm.

Die kern van sy boodskap is om vaders aan te spoor om 'n liefdevolle en ondersteunende huisgesin te bou. Hy glo dat dit essensieel is om kinders met liefde en wysheid te lei en om kosbare oomblikke saam as gesinne te deel. 

Hierdie boek dien as 'n herinnering aan die erfenis wat vaders kan nalaat.

Hy en sy vrou het die voorreg om 14 jaar lank getroud te wees en hulle is geseënd met vier pragtige dogters. 

Hy is 'n onderwyser van beroep, maar die werklikheid is dat sy passie in vaderskap lê. Die vonk van skryf is aangesteek toe hy besef het dat hy hierdie boodskap met ander vaders moet deel.

Jan glo opreg dat hierdie boek 'n inspirasie sal wees vir almal wat dit lees. "Mag dit pappas aanmoedig om die liefde van God en die waarde van vaderskap te omhels."

‘Ons bring jou die nuutste Tuinroete, Hessequa, Karoo nuus’