OUDTSHOORN NUUS - Bridgton het verlede Saterdag op sy tuisveld soete wraak geneem vir hul eerste ronde verloor teen Heidelberg om die besoekers in 'n opwindende wedstryd met 50 - 45 te klop.
Die tuisspan was rustyd met 23 - 19 voor.
Die wedstryd het deurgaans sprankelende hardlooprugby opgedis en 15 drieë opge-lewer - agt deur Bridgton en sewe vir Heibi.
Heibi het een van sy sleutelspelers, Corbin Swartbooi (heelagter) vroeg in die wedstryd met 'n ernstige armbesering verloor.
Vir Heibi het Jason Liebenberg (senter), twee keer gaan druk, met sy sentermaat, Francois Pieters, Anrich Manho (linkervleuel), Lindon Hartnick (agsteman en kaptein), Marcelino Meyer (flank) en Ivor van der Merwe (slot), wat elk een drie gedruk het. Enslin Naudt (plaasvervangerheelagter), het twee straf- en twee doelskoppe bygevoeg.
Die derde spanne van albei klubs het met 19 - 19 gelykop gespeel nadat die rustydtelling 14 - 12 in Heibi se guns was.
Heibi se puntemakers was Tyron Marais (skrumskakel), met twee drieë en Henry Arendse (stut), met een drie. Veandré Carelse (skrumskakel), het twee doelskoppe aangeteken.
Bridgton se tweedes het Heibi naelskraap met 11 - 7 gewen. Met rustyd het geen span nog punte aangeteken nie.
Heibi se puntemakers was Beaugram van Niekerk (senter), met een drie, terwyl Germaine Hoogbaard (losskakel), 'n doelskop bygevoeg het.
Heibi beklee nou die vierde plek op die punteleer en sal sy sokkies moet optrek en sy oorblywende wedstryde wen as hy nie verder wil afskuif op die punteleer nie.
‘Ons bring jou die nuutste Tuinroete, Hessequa, Karoo nuus’
