STILBAAI NUUS - 'n Groep inwoners betrokke by die Bewaringstrust is tans besig om indringergewasse en in besonder rooipitjies (Acacia mearnsii) uit te roei op die sandtong naby die Goukou estuarium.
Die poging om die plante in die gebied uit te roei kom al jare aan. George Sabbagha van die trust vertel dat hy die eerste keer hierby betrokke geraak het in 1976.
"Dit was nog altyd deel van die Stilbaai Bewaringstrust se vakansieprogram waar een dag gedurende die vakansie 'n uur of wat afgestaan is om rooipitjie te trek."
'n Besluit is tydens die 2014 jaarvergadering geneem om voortaan een dag per maand 'n uur in die oggend af te staan om dié takie te gaan verrig. "Ons probeer om dit op 'n Vrydagoggend te doen en wil gedurende die somertyd so teen 07:00 begin voor dit te warm word. Gedurende die winter sal ons eers teen 08:00 begin."
Kommunikasie oor die datums sal op die trust se Facebook-groep, 'Stilbaai Bewarings Trust' bekendgemaak word.
Rooipitjie is een van die drie indringer spesies wat groot skade aanrig in Hessequa en is almal afkomstig van Australië.
In die verlede was die aanplant van die bome as 'n goeie opsie gesien, veral langs die kus waar dit as goeie windbrekers aangeplant is. Rooikrans (Acacia cyclops) naamlik rooipitjie, wildebos, hoenderboom of baaibos is 'n digte, ondeurdringbare struik en is 'n groot gevaar vir Laeland fynbos.
Indringergewasse word in drie kategorieë verdeel:
Kategorie 1-plante mag nie op enige grond of binnelandse wateroppervlakte, behalwe onder streng beheer in 'n afgebakende gebied, gevestig of in stand gehou word nie.
Plante op die lys moet volgens wet deur grondeienaars uitgeroei word. Die kategorie word as die strengste kategorie erken. Bekende kategorie 1-plante sluit in die Hakea-spesie naamlik, Hakea drupacea, Hakea gibbosa en Hakea sericea.
Kategorie 2-plante word vir kommersiële gebruik aangeplant. Dit mag net in afgebakende gebiede of biologiese gekontroleerde gebiede aangeplant word. Die aanplant van die plante deur tuiniers is onwettig. Van Hessequa, en veral Stilbaai se grootste indringers val onder hierdie kategorie, die rooipitjie/rooikrans (Acacia cyclops), swartwattel (Acacia mearnsii) en port jackson (Acacia saligna).
Die wit populier (Populus alba) is ook 'n kategorie 2-indringer.
Kategorie 3-plante mag nie op enige grond of binnelandse wateroppervlak aangeplant of gevestig word nie, behalwe in die geval van die kategorie 3-plante wat reeds gevestig was ten tye van die inwerkingtreding van die regulasies.
Dit is veral noodsaaklik om daarop te let dat uitheemse gewasse nie aangeplant mag word as nuwe aanplantings nie.
Kwekerye mag ook nie kategorie 3-plante te koop aanbied nie. Kategorie 3-indringers sluit in die brasiliaanse peperboom, die skoenlapper orgideëboom, die orgideëboom, die morning glory en die manatok. Die manatok (Myoporum tenuifolium) is 'n groot indringerplant in Stilbaai.
* Vir meer inligting oor die trust se ontbossing-projek kontak Sabbagha by 083 650 7430
ARTIKEL: LOUISE MOUTON, SUID-KAAP FORUM JOERNALIS.
'Ons bring jou die nuutste Stilbaai, Hessequa nuus'
