_80952.jpg)
HESSEQUA NUUS - 'n Somber jaar word vir verbruikers voorspel deur ekonome en ontleders.
In Desember het inflasie skerp gestyg en kospryse is reeds besig om aan verbruikers se beursies te raak. Die erge droogte kan volgens ekonome veroorsaak dat kospryse teen die middel van die jaar met 10% kan styg. Senzeni Zokwana, minister van Landbou, Bosbou en Visserye is in hoofstroom media aangehaal dat daar ongeveer vyf tot ses miljoen wit- en geelmielies ingevoer sal moet word weens die droogte.
Suid-Afrika se witmielie gebruik is volgens berigte ongeveer 10 miljoen ton. Boere kan tans slegs 5 miljoen ton aan die plaaslike mark verskaf.
Cosatu het die afgelope week beswaar aangeteken oor die stygende mielieprys. 'n Bekende Sondagkoerant het die afgelope naweek berig dat landboukenners egter van mening is dat kospryse tussen 20% tot 30% kan styg en vleispryse kan verdubbel. Daar is verskeie redes vir die drastiese styging in kospryse, waarvan die droogte en die swak rand die grootste is.
Die weer speel 'n groot rol en kan produksie negatief beïnvloed. Die Suid-Afrikaanse Weerdiens het in die media bevestig dat 2015 die droogste jaar sedert 1904 was. Met die rand wat verswak word invoere verminder en pryse styg. Suid-Afrika voer baie kos en bestanddele in soos hoender, rooivleis, mielies en oliesade.
Die mielietekort laat graanpryse styg. Die hoë koste van elektrisiteit, water en arbeid laat produkte wat veral water en krag intensief afhanklik is se pryse styg, soos groente.
• Beplan jou maaltye en doen inkopies daarvolgens.
• Koop in grootmaat (slegs prokukte wat 'n lang raklewe het).
• Eienaam-produkte is gewoonlik 'n winskopie en van goeie gehalte.
• Hou advertensies dop vir spesiale aanbiedinge by jou supermark of hipermarkte.
• Leer om maaltye en porsies te vries.
• Groentemarkte is 'n goeie keuse om goedkoop vrugte en groente te kry en hoogs waarskynlik ook organies is.
Koop vrugte en groente in seisoen, dit is gewoonlik goedkoper.
• Probeer om een dag in die week 'n vleisvrye dag te maak.
ARTIKEL: LOUISE MOUTON, SUID-KAAP FORUM-JOERNALIS
'Ons bring jou die nuutste Hessequa nuus'
