Wêreldberoemde sopraan vanaand in konsert

STILBAAI NUUS - Musiekliefhebbers gaan die jaar afskop met 'n spesiale liefdadigheidskonsert deur die wêreldberoemde sopraan, Johanni van Oostrum.

Sy het op Stilbaai besluit vir dié konsert omdat haar ouers woonagtig is op die dorp. Die netto opbrengs van die konsert gaan geskenk word aan Jagersbosch Gemeenskapsorgsentrum en die Hartliefklas van Laerskool Bertie Barnard. Eline Troskie, Johanni se suster tree die aand saam met haar op. Eline is 'n sopraan en solokunstenaar in eie reg met 'n merkwaardige solo sangloopbaan in Suid-Afrika. Janny Lobbezoo sal optree as begeleier vir die twee talentvolle sussies.

Van Oostrum is woonagtig in Nederland, maar het haar opleiding ontvang van 'n bekende in operakringe, Miemie Coertze en was ook 'n lid van die Black Tie Opera Studio.

In 2005 het sy 'n Nederlandse sangkompetisie gewen, asook 'n eersteprys in die solo kompetisie van die Oratorio Society van New York in die Weill Recital Hall in Carnegie Hall - 'n besonderse eer vir 'n meisie van Suid-Afrika. 'n Groot stap in die sopraan se loopbaan was toe sy die rol van Marchallin oorgeneem het in De Rosenkavalier by die Nasionale Opera in Amsterdam.

Hier het sy die titelrol van Ka’ta Kabanova deur Janacek onder direksie van Harry Kupfer gesing. Hierna het haar sangloopbaan momentum gekry met meer optredes. Dit het ingesluit: die Komische Opera Berlin, Rahvusooper Tallinn, die National Theatre in Brno, Deutches Nationaltheater Weimar, Hessische State Theatre Wiesbaden en die Graz Opera in Oostenryk.

Haar debuutrol as Elsa in Lohengrin in die Deutches Nationalteater was met groot entoesiasme en akklamasie begroet deur die pers. Sy het ook haar operageselskap- debuut gemaak in die Bavariese Staatsopera in Munchen as la Contessa in die Huwelik van Figaro onder die stok van Ivor Bolton.

* Die konsert vind plaas Vrydagaand, 23 Januarie om 19:30 in die NG Kerksaal-Oos op Stilbaai. Kaartjies kos R60 vir lede en R80 vir nie-lede en kan bekom word by Cupz Cafe in die Fynbossentrum of by die deure.

Klik hier vir 'n vorige nuusflits.