SUID-KAAP NUUS - Hugo Theart is aangestel as die nuwe kreatiewe hoof van Kunste Onbeperk, die maatskappy wat ondermeer die Absa Klein Karoo Nasionale Kunstefees (KKNK) en Klein Karoo Klassique aanbied.
Theart is vanaf 1 Julie 2015 verantwoordelik vir die skep en bestuur van Kunste Onbeperk se programinhoud en die maatskappy se verhoudings in die kunstebedryf.
“Hugo se kundigheid en vaardigheid as teatermaker en die passie waarmee hy kunstenaars se belange op die hart dra, het ons beïndruk,” sê Rhodé Snyman, uitvoerende hoof van Kunste Onbeperk.
Vir Theart is dit ’n opwindende uitdaging om by die Kunste Onbeperk-span aan te sluit om ’n bydrae te maak tot die skep van ’n meer standvastige toekoms vir die kunste in Suid-Afrika.
“Die KKNK en Klein Karoo Klassique staan sentraal binne die organisasie, maar dit is ook my doelwit om op ander maniere en in samewerking met ander kunste-organisasies en –instansies doeltreffende projekte aan te pak wat kan bydra tot die ontwikkeling van interessante en inspirerende inhoud en die ontwikkeling van vakmanskap by kunstenaars,” sê Theart.
Theart werk die afgelope 20 jaar as ’n vryskut vervaardiger, regisseur, akteur en produksiebestuurder in verskeie vertakkings in die vermaaklikheidsbedryf.
Sedert 2009 onder die TEATERteater-vaandel vervaardig hy onder meer bekroonde en hoogaangeskrewe produksies soos Tom Lanoye se Bloed en rose: Die lied van Jeanne and Gilles (2014), macbeth.slapeloos (2013), Reza de Wet se Op dees aarde (2012), Manfred Karge se As die broek pas (2010) en Marlene van Niekerk se Die kortstondige raklewe van Anastasia W (2010).
Hy is ’n komiteelid van die Teaterbystandsfonds (TBF) en koördineer en fasiliteer ’n dramagroep as deel van die Goedgedacht Trust in die Boland. Theart het ’n B-graad en Meestersgraad in drama aan die Universiteit Stellenbosch verwerf, waar hy ook ’n deeltydse dosent is.
Voorstelle vir aanbiedings by volgende jaar se Absa KKNK word reeds ontvang en meer inligting is by www.absakknk.co.za beskikbaar.
Die sewende Klein Karoo Klassique, Oudtshoorn se winterfees van klassieke musiek, kuns, kos en wyn vind van 13 tot 16 Augustus plaas.
'Ons bring jou die nuutste Tuinroete, Klein-Karoo, Hessequa nuus'
