SUID-KAAP NUUS - Die jongste interklub-kompetisie van die Suid-Kaap Rots en Strand Hengelvereniging is in die Plettenbergbaai-gebied onder goeie hengelomstandighede gehou en in weerwil van die baie vis wat gevang is, was die oorgrote meerderheid aan die ligte kant.
'n Totaal van 194 hamerkophaaie het die meeste van die vangste opgemaak uit 'n totaal van 270 visse wat gevang is. Hiervan is 269 weer lewendig teruggesit.
Die grootste eetbare en oneetbare vis ten spyt het die Stilbaai Hengel-klub baie goed gevaar en met meer as 85 punte voor hul naaste teenstander op die dag geeïndig.
Die twee mooi vangste het egter Outeniqua in staat gestel om die derdeplek in te neem. Johan Strauss, van Outeniqua Hengelklub, het die grootste eetbare vis, 'n steenbras van 10.4kg, gevang met Peter O'Moore, ook van Outeniqua Hengelklub, wat die grootste oneetbare vis, 'n skeurtandhaai van 101.5kg, gevang het.
In die B- en C-liga het Outeniqua Hengelklub se spanne egter koning gekraai.
A-liga: 1. Stilbaai 215.96; 2. Triton 130.59; 3. Outeniqua 111.45; 4. Atlantic 85.18; 5. George 77.98; 6. Knysna 74.73; 7. Mosselbaai 59.19.
B-liga: 1. Outeniqua 124.19; 2. Atlantic 56.41; 3. Knysna 35.45; 4. George 28.40; 5. Weermag 18.83; Triton 1.63.
C-liga: 1. Outeniqua 29.80; 2. Atlantic 27.46.
Die volgende interklub-kompetisie vind op Saterdag, 14 Maart plaas.
'Ons bring jou die nuutste Suid-Kaap nuus'
