RUGBY NUUS - - Na 'n teleurstellende vertoning die vorige week op hul tuisveld teen Groot-Brakrivier, het Heidelberg Saterdag 15 Julie hul speltempo gelig en met 'n verbeterde vertoning vorendag om Maori's van George met 48 - 25 kaf te draf.
Rustyd was Heibi met 29 - 13 voor.
Dit het behoorlik drieë gereën met Heibi wat sewe keer gaan druk het en Maoris drie keer.
Vir Heibi het hul bobaassenter, Francois Pieters, twee keer gaan druk, terwyl Corbin Swartbooi (heelagter), Anrich Manho (linkervleuel), Ivor van der Merwe (slot), Jaques Thyse (haker) en Hughgan Meyers (stut) elkeen 'n drie gedruk het. Swartbooi het ook met drie strafdoele en twee doelskoppe geslaag.
Heibi se C-span het ook met 26 - 12 koning gekraai nadat hulle rustyd met 19 - 12 voor was. Heibi se puntemakers was Duane du Plessis (agsteman), Sadrick Pieters (flank), Henry Arendse (stut) en Elandré Links (slot) met een drie elk. Veandré Carelse, skrumskakel het drie van die drieë verdoel.
Die wedstryd tussen die tweede spanne het die besoekers naelskraap met 19 - 17 gewen nadat hulle rustyd met 14 - 5 rustyd voor was. Albei spanne het drie drieë ingeryg.
Vir Heibi het Simon du Toit (slot), Shirgené Swartbooi (senter) en Carlo Williams (regtervleuel elkeen een drie gedruk, terwyl Germaine Hoogbaard (skrumskakel) met twee doelskoppe geslaag het.
Heibi se volgende wedstryd is Saterdag 22 Julie tuis teen Jaguars van Plettenbergbaai en hulle sal 'n groot fout begaan as hulle dié span geringskat.
‘Ons bring jou die nuutste Tuinroete, Hessequa, Karoo nuus’
