Heibi ryg nege drieë in

HEIDELBERG NUUS - Heidelberg-rugbyklub het Saterdag 22 Julie hul kanse om die uitspeelrondes te haal lewendig gehou met 'n groot, dog nie so indrukwekkende sege, van 57 - 10 oor Jaguars van Plettenbergbaai.

Heibi was rustyd met 26 - 7 voor.

Hoewel Heibi nege drieë ingeryg het, het hulle nie soos 'n goed geoliede masjien spel in alle fasette oorheers nie. Maar hul fanatiese ondersteuners is sekerlik met breë glimlagte huis toe.

Nou wag daar twee taai wedstryde ná die welverdiende ruskans die komende Saterdag.

Vir Heibi het Lorenzo Gordon twee keer gaan druk, terwyl Lyndon Hartnick (kaptein en slot), Jason Liebenberg (senter), Jameson Meyers (losskakel), Marcel Marais (skrumskakel), Jaques Thyse (haker), Eslin Naudt (plaasvervanger-linkervleuel) asook Corbin Swartbooi (heelagter), elk een keer agter die doellyn gaan kuier het. Swartbooi het met ses doelskoppe geslaag.

André Maxin storm verwoed vorentoe met die bal. Foto: Heinrich Fortuin

Heibi se derde span het met 47 - 0 koning gekraai nadat hulle rustyd met 28 - 0 voor was.

Vir Heibi het Elandré Links (slot) en Laughton Pieterzen (haker), elk twee drieë gedruk en Duane du Plessis (agtsteman) en Devon Davids (heelagter), elk een keer. Veandré Carelse (skrumskakel) het vier drieë verdoel met een strafskop en Dimitri Stevens (losskakel), het met twee strafskoppe geslaag.

Heidelberg se tweede span het ook hul wedstryd gemaklik met 29 - 12 gewen nadat hulle rustyd met 19 - 12 voorgeloop het.

Hulle het vyf drieë ingeryg waarvan Reginald Salmon (regtervleuel) en Duvin Jacobs (haker), elk twee keer agter die doellyn gaan kuier het, terwyl Dimitri Stevens (plaasvervanger-regtervleuel), ook een keer gaan druk het. Ben Pieters (losskakel), en Carlo Williams (heelagter), het elkeen een drie verdoel.

Heibi se volgende wedstryd is Saterdag 5 Augustus weg teen Bridgton van Oudtshoorn en hier kan 'n reusestryd verwag word met Heibi wat tans nog tweede op die punteleer is. As Crusaders Saterdag 29 Julie teen Riversdal Blues wen sal Heibi in die derde plek wees.

Jason Liebenberg jaag doellyn toe vir sy drie.