HEIDELBERG NUUS - Heidelberg het die afgelope Saterdag hul tweede vriendskaplike wedstryd tuis in die doodsnikke met 33-26 gewen.
Dié keer was dit teen Montagu nadat hulle met die rustydtelling op 19-19 gedraai het.
In die hoofwedstryd tussen die twee eerste spanne het Heibi vyf drieë gaan druk teenoor Montagu se vier.
Vir Heibi het Eslin Noudt, heelagter, twee keer gaan druk, terwyl, Jaco Michaels, slot en kaptein, Maurico Radlof, stut, en André Maxin, agtsteman, elk een drie gedruk. Ben Pieterse, losskakel, het met twee doelskoppe geslaag, met Noudt wat ook een van sy drieë verdoel het.
Montague se puntemakers was Handré Ontong, regtervleuel, Novelin Koker, losskakel, Whallen Claassen, linkervleuel, en Renaldo Koker, wat elkeen een drie gedruk het. Charlton Scholtz, senter, het met drie doelskoppe geslaag.
In die wedstryd tussen die derde spanne het Heibi met 19-8 koning gekraai nadat hulle rustyd met die telling op 14-5 gedraai het.
Heibi se tweedes het wegholoorwinning van 43-0 behaal nadat hulle rustyd met 19-0 voorgeloop het.
Heibi speel Saterdag (22 Februarie) weg teen Swellendam en hier kan hulle ‘n verwoede stryd verwag aangesien die tuisspan hul nederlaag van twee weke gelede sal wil wreek.
‘Ons bring jou die nuutste Tuinroete, Hessequa, Karoo nuus’
