WITSAND NUUS - Ná dae se kommer en teenstrydige berigte oor moontlike waterbesoedeling, het die Hessequa-munisipaliteit sy inwoners gerusgestel dat Witsand se drinkwater veilig is vir menslike gebruik, volgens amptelike en geverifieerde toetsresultate.
Die gerusstelling volg nadat die Witsand Port Beaufort-gemeenskapsforum vroeër onafhanklike watermonsters laat toets het, wat na bewering bakteriële besoedeling, insluitend E. coli en enterokokke, aangedui het.
Dit het gelei tot wydverspreide kommer onder die inwoners, en sommige het gesondheidsklagtes aangemeld.
In ’n amptelike verklaring op Vrydag 24 April sê die Hessequa-munisipaliteit egter dat alle onlangse en geverifieerde watergehaltetoetse - uitgevoer deur die munisipaliteit self, Overberg Water en die Tuinroete-distriksmunisipaliteit - bevestig dat geen gevaarlike vlakke van bakterieë in die watervoorsiening teenwoordig is nie.
Volgens die munisipaliteit sluit die toetsing mikrobiologiese ontledings in vir aanwysers soos E. coli en totale koliforme, en voldoen die water aan alle regulatoriese standaarde vir drinkwater.
’n Formele vergadering is intussen tussen die munisipaliteit en die gemeenskapsforum gehou, waartydens die toetsresultate voorgelê en bespreek is.
Die munisipaliteit sê die bewerings van onveilige water kon nie deur sy data bevestig word nie.
Daar is wel ooreengekom dat toekomstige onafhanklike toetse in samewerking tussen die partye sal plaasvind, en dat beide teenwoordig sal wees om deursigtigheid te verseker.
Die uitvoerende burgemeester, Grant Riddles, het beklemtoon dat die munisipaliteit verbind bly tot die beskerming van openbare gesondheid en die voortgesette monitering van watergehalte.
Inwoners word aangemoedig om op amptelike kommunikasie staat te maak en enige bekommernisse direk by die munisipaliteit aan te meld.
Vorige berig:
Onveilige water skok Witsand en Port Beaufort
‘Ons bring jou die nuutste Tuinroete, Hessequa, Karoo nuus’
