HESSEQUA NUUS - Die Vlakte-marathon het vanjaar weer bewys dat die geleentheid oor méér as net hardloop gaan.
Dit gaan oor omgee, ondersteuning en om werklik 'n verskil in die gemeenskap te maak.
Danksy die ondersteuning van atlete, borge en ondersteuners kon 'n hospitaalbed, rolstoel en bedpanne onlangs aan Hessequa Versorgers oorhandig word.
Die organisasie bied met deernis en toewyding ondersteuning, bewusmaking en praktiese hulp aan kankerpasiënte en hul families in die Hessequa-streek.
Desery van Deventer en Loretta Gordon het die skenking namens Hessequa Versorgers van Nico Steyn van die Vlakte-marathon ontvang.
Organiseerders het hul dank uitgespreek teenoor elke atleet, borg en ondersteuner wat bygedra het om hoop en tasbare hulp na mense in nood te bring.
Volgens die span is dit juis hierdie gees van saamstaan wat die Vlakte-marathon 'n besondere gemeenskapsgeleentheid maak.
‘Ons bring jou die nuutste Tuinroete, Hessequa, Karoo nuus’
