STILBAAI NUUS - Die Stilbaai-gemeenskap is in rou ná die skielike en tragiese dood van ’n geliefde inwoner, Robbie Robbertze (65), wat Maandag 30 Junie tydens ’n branderski-sessie op die Goukourivier verdrink het.

Volgens Stéfan Grové, stasiekommandant van NSRI - Stasie 31 Stilbaai, het die NSRI se diensspan Maandagmiddag om 15:58 op ’n noodoproep gereageer nadat ’n man in nood aangemeld is naby die plaaslike pier, stroomop in die Goukourivier.

Robbie Robbertze, wat saam met ’n vriend besig was om op die rivier te branderski, het na bewering skielik en sonder waarskuwing uit sy ski geval. 

’n NSRI-bemanningslid, wat die voorval gesien het, het onmiddellik ingespring om te help en die man se vriend bygestaan om die slagoffer uit die water te haal. 

Kardiopulmonêre resussitasie (KPR) is begin terwyl die nooddienste ontbied is.

Mediese personeel van die Wes-Kaapse departement van gesondheid, die polisiediens en die NSRI het vinnig op die toneel gereageer. 

KPR is voortgesit terwyl die pasiënt per ambulans na plaaslike dokters geneem is. Ten spyte van alle pogings om hom te red, is Robbertze by die spreekkamers dood verklaar.

Die NSRI het hul innige meegevoel en medelye uitgespreek teenoor Robbertze se familie en vriende, en het hom beskryf as ’n man wat wyd geliefd en gerespekteer was binne die Stilbaai-gemeenskap en by die NSRI self.

Hierdie tragiese voorval laat ’n leemte in die harte van baie. 

Die hele gemeenskap staan saam in hul ondersteuning van die Robbertze-familie in hierdie moeilike tyd.

‘Ons bring jou die nuutste Tuinroete, Hessequa, Karoo nuus’