RIVERSDAL NUUS - Rebecca Johnson, eienaar van Becca's Soup Kitchen (Becca's-sopkombuis) in Kwanokuthula, sit met haar hande in haar hare. Kosskenkings en geldelike bydraes van donateurs en barhartige Samaritane het feitlik opgedroog. "Ons kry so hier en daar kos, soos groete en sopmengsels, maar dis nie naastenby genoeg om aan die groot behoefte te voorsien nie. Wie gaan kos kry en wie moet ons met leë hande huistoe stuur," vra sy.
Die sopkombuis gee op Maandae, Woensdae en Vrydae sop, brood en soms bredies vir sowat 179 geregistreerde begunstigdes, wat bejaardes en jong kinders insluit.
Ná Suid-Kaap Forum verlede jaar 'n beroep op inwoners gedoen het om kos te skenk vir dié geregistreerde sopkombuis, het Hessequa hul harte en hande oopgemaak. Van plaasboere, tot besighede en talle inwoners het pakke groente en 'n verskeidenheid sopmengsels by die koerantkantoor kom aflewer. Ook gevriesde vleis en sopbene, hoendernekkies - alles om 'n heilsame pot met sop voor te berei.
Dit was opvallend hoeveel pensionarisse het een tot twee keer per maand 'n pakkie met brood en groente kom aflewer - self mense wat dit nie breed het nie.
Rebecca het 'n beroep op inwoners gedoen om te help, al is dit net 'n brood of 'n pakkie sop. "Elke bietjie sal help."
Skenkings kan afgelewer word by Suid-Kaap Forum se kantoor in Heidelbergweg 29 net langs die NG-kerk Wes-gemeente. Weeksdae enigiets van 08:00 af tot 18:00.
Die redakteur, Hugo Redelinghuys, of Sade Rossouw sal dit persoonlik ontvang.
‘Ons bring jou die nuutste Tuinroete, Hessequa, Karoo nuus’
