STILBAAI NUUS - Dit is alombekend dat die Baai van die Slapende Skoonheid bekend is vir Kalkrant Fynbos wat welig voorkom, maar nou blyk dit dat ander botaniese wonders ook hier groei.
Vroeg in 2014 het Frik van Rhyn en Naomi van Schalkwyk van die Tuin-op-die-Brak afgekom op eienaardige bolplante aan die westekant van die Goukourivier. Gedroogde materiaal en 'n foto is na die Bolus Herbarium by die universiteit van Kaapstad gestuur om identifikasie te bevestig.
Groot was die verbasing toe die identifikasie terugkom as Fockea edulis of in Afrikaans, 'n kambroo/kambaroe.
“Hierdie plante kom nie normaalweg hier voor nie. Om die waarheid te sê word dit volgens die 'Guide to the Plant Genera of the South Western Cape' as 'n 'rarely found' beskryf en kom voor in die Worcester/Robertson gebied, asook by De Hoop”, vertel van Schalkwyk.
Dié spesies se normale groeiplek is in die Karoo, Namakwaland en selfs verder noord. “Die groot bol is deur die Boesmans gebruik as ‘n bron van water. Aan die Weskus en in die Karoo word konfyt daarmee gekook, soortgelyk aan waatlemoenstukke.”
Die afgelope maand het Patric en Alice Duddy tydens ‘n voëlkykuitstappie afgekom op nog 'n Karooplant wat normaalweg voorkom in die Kaapse berge, Namakwaland, Namibië en Botswana. Cadaba aphylla, oftewel swartstorm.
“Die aphylla dui aan dat die plant nie blare het nie en die besonder interessante blomme is bloedrooi en word in trosse gedra. ‘n Moontlike verklaring vir die voorkoms hier by ons is ‘n opmerking deur Keith Palgrave in sy boek, Trees of Southern Africa. Hy noem dat dit te vinde is in droë Bosveld, semi-woestyn gebiede en kalksteen formasies. Op Stilbaai is groot dele kalksteen formasies, gevolglik sou swartstorm hier kon aanpas.”
'n Ander vraag wat gevra kan word, is hoe die plante hier beland het, vertel sy, “en dan moet ons onthou dat voëls ver vlieg met saad in hul bekke of in hul ingewande! Dalk is dit weens aardverwarming. Ons kan net die situasie dophou en die interessante dinge van die natuur geniet.”
ARTIKEL: LOUISE MOUTON, SUID-KAAP FORUM-JOERNALIS
Klik hier vir 'n vorige nuusflits.
'Ons bring jou die nuutste Stilbaai, Hessequa nuus'
