HESSEQUA NUUS - Verkragting is meestal 'n taboe onderwerp, maar tog kry jy slagoffers wat hul stem wil laat hoor.
Suid-Kaap Forum was in gesprek met 'n 17-jarige skoolmeisie wat op die ouderdom van sewe jaar deur 'n familielid gemolesteer en eindelik verkrag is.
"Ek het eers nie verstaan wat gebeur nie. Hy het in die aande by my kom lê en speletjies gespeel. Dit het so aangehou tot die ouderdom van 13-jaar toe hy my verkrag en my baie seergemaak het." Volgens haar het sy nie besef dit is verkeerd nie tot 'n biologie onderwyser hulle eendag vertel het van molestering.
"Ek was 14 toe ek vir die eerste keer hieroor gepraat het." Nadat sy 'n onderwyser in haar vertroue geneem het, is sy hospitaal toe geneem vir toetse en 'n klag aanhangig gemaak by die polisie. Sy het vir haar ma 'n brief geskryf wat erg geskok was oor haar bekentenis.
"My ma was die enigste persoon wie my geglo het. Hulle het drie keer in die hof verskyn, maar die familie het die saak later teruggetrek omdat sy nie meer kans gesien het vir die ondersoek en gepaardgaande hofsake nie. Vandag sien sy hom nog af en toe, maar ontwyk hom. "Ek is bang vir hom."
Sy is spyt dat sy nie vroeër gepraat het nie. "Vandag kan ek net kinders waarsku, dit is nie reg dat iemand aan jou privaatdele vat nie. Dit is nie liefde of 'n speletjie nie, dit is verkeerd." Haar raad is ook om nie stil te bly nie. "Praat daaroor, vertel jou ma, jou onderwyser of 'n volwassene wat jy vertrou."
Volgens kundiges is die belangrikste hulpmiddel 'n oop, sterk verhouding tussen ma en kind en dat sy dit ernstig opneem en dadelik optree. Die kind moet dadelik uit die gevaarsituasie verwyder word en die klag aangemeld word. Dit is ook noodsaaklik om dadelik berading vir jouself, asook jou kind te kry. Ouers van 'n gemolesteerde kind moet ingedagte hou dat die kind se gedrag kan verander, daar skuldgevoelens kan wees en onveilig kan voel.
Die stasies in die streek beskik oor opgeleide traumaberaders wat jou emosioneel en sielkundig kan bystaan.
• Stilbaai Polisie (028 754 6100) beskik oor vier opgeleide vrywilligers wat op 24-uur bystand is wat enige slagoffer van misdaad bystaan indien hulle dit verlang.
• Riversdal Polisie (028 713 8500) beskik oor 'n slagofferbystandskamer en is 24-uur beskikbaar. Tans is daar twee vrywilligers en geen noodnommer nie. Gewoonlik gaan die slagoffers na die polisiestasie, waarna hulle na die slagofferbystandskamer geneem word, waar dit meer privaat is.
• Albertinia Polisie (028 735 8040) het ook 'n traumakamer en beraders. Die noodnommer is 067 737 1249.
• Heidelberg Polisie (028 722 1910) het 'n traumakamer en vrywilligers wat 24-uur per dag beskikbaar is. Daar is geen noodnommer nie.
Die polisie klassifiseer seksuele misdrywe as: Sonder toestemming (verkragting), ongewenste seksuele aanraking of om geforseer te word om in enige vorm van 'n vernederende seksuele aktiwiteit deel te neem.
Wat is die verskil tussen statutêre verkragtings, bloedskande, dwangverkragting en onsedelike aanranding?
• Statutêre verkragting: Wanneer iemand 'n daad van penetrasie met 'n kind tussen die ouderdom van 12 en 16 jaar pleeg, of daartoe ingestem word of nie.
• Bloedskande: Om met of sonder instemming bloedfamilie (moeder, suster, broer, vader, neefs, niggies, tantes of ooms) of aangenome familielede, seksueel te penetreer.
• Dwangverkragting: Wanneer iemand 'n derde persoon dwing om iemand anders te verkrag (gedwonge seksuele aanranding, of gedwonge self-seksuele aanranding is ook misdrywe).
• Onsedelike aanranding: Ander dade van seks sonder die slagoffer se instemming, of die dreigement om dit uit te voer, wat nie binne die wetlike definisie van verkragting beskryf word nie.
ARTIKEL: LOUISE MOUTON, SUID-KAAP FORUM-JOERNALIS
'Ons bring jou die nuutste Hessequa nuus'
