HESSEQUA NUUS - Sersant Chris Jansen, media skakeloffisier van die Riversdal-polisie, sê hulle ervaar tans 'n ernstige probleem met swendelaars wat veral bejaarde persone teiken. Die swendelaars kontak slagoffers telefonies en doen hulle voor as bankamptenare.

Hulle oortuig mense dat iemand besig is om hulle bankrekeninge leeg te trek en verkry sodoende persoonlike bankbesonderhede. Slagoffers word ook aangesê om op hul selfoonbankdienste in te teken, waar die swendelaars dan sekere instellings verander en geld uit die rekeninge onttrek.

Volgens sersant Jansen is daar die afgelope tyd verskeie sulke gevalle in die Hessequa-gebied aangemeld.

Hy doen 'n beroep op die publiek om  sulke oproepe onmiddellik te beëindig en eerder self die bank te besoek om vas te stel of daar enige ongerymdhede op hulle rekeninge is.

Kliënte word verder aangeraai om hul bank se bedrog-aanmeldingsnommer te alle tye byderhand te hê en dit te skakel indien hulle vermoed dat 'n swendelaar probeer om toegang tot hul bankrekening te verkry. Dit is veral belangrik indien jou bank nie 'n tak in die dorp het nie, of indien swendelaars jou buite kantoorure kontak.

‘Ons bring jou die nuutste Tuinroete, Hessequa, Karoo nuus’