Update
HEIDELBERG NUUS - Die veldbrand in die Heidelberg-omgewing is tans onder beheer naby infrastruktuur, hoewel die brand steeds onbeheerbaar voortwoed op die noordelike en boonste hange van die berg.
Owerhede bevestig egter dat dié deel van die brand tans geen bedreiging vir infrastruktuur inhou nie.
Volgens die Garden Route Distriksmunisipaliteit se Wildbrandwaarskuwing 8, uitgereik op Dinsdag 13 Januarie 2026 om 20:45, was die hoofdoelwitte om die brand oos van die Tradouwpas te beheer, asook om alle brandlinies wes en suidwes van Strawberry Hill en die Grootvadersbosch Natuurreservaat se infrastruktuur te onderdruk.
Hierdie doelwitte is suksesvol bereik deur ’n kombinasie van teenbrandaksies en direkte brandbestryding.
Die Tradouwpas was nietemin deur die nag noukeurig gemonitor en gepatrolleer om enige beweging of verdere verspreiding van die brand weswaarts betyds op te stop.
Die heersende windrigting was gunstig.
Die suidoostelike brandlyn was gedurende die nag verder beveilig deur nabluswerk.
Verskeie rolspelers is steeds op die toneel, waaronder die Garden Route Distriksmunisipaliteit, CapeNature, Working on Fire, Overberg Distriksmunisipaliteit se Brand- en Reddingsdienste, asook betrokke grondeienaars.
Lede van die publiek word versoek om enige veld- of bosbrand onmiddellik aan te meld by die GRDM Noodoproepsentrum op 044 805 5071, of via WhatsApp by 081 709 5193.
‘Ons bring jou die nuutste Tuinroete, Hessequa, Karoo nuus’
