GOURITSMOND NUUS - Die veldbrand noord van Gourikwa by Gouritsmond is teen Woensdag 18 Februarie om 10:00 grotendeels onder beheer, volgens ’n opdatering van die Garden Route District Municipality.
Nagspanne het die mees kritieke beheerlane suksesvol beveilig deur strategiese teenbrande toe te pas.
Die noordoostelike en suidoostelike brandlyne is vasgemaak en geanker, en met die voorspelde westewinde is owerhede vol vertroue dat dié lyne sal hou.
Daar is egter steeds ’n aktiewe warmkol langs die westelike lyn wat voorheen ontoeganklik was.
Hierdie gebied sal met eerste lig prioriteit geniet. Bykomende grondspanne sal ontplooi word om beheermaatreëls te versterk en met opruimingswerk voort te gaan.
Rolspelers op die toneel sluit in Hessequa Fire & Rescue Services, Southern Cape Fire Protection Association, Working on Fire, Albertinia-vrywilligers en plaaslike grondeienaars.
Enige veld- of bosbrand moet onmiddellik by die GRDM-noodoproepsentrum aangemeld word by 044 805 5071 of via WhatsApp by 081 709 5193.
‘Ons bring jou die nuutste Tuinroete, Hessequa, Karoo nuus’
