SLANGRIVIER NUUS - Arrows-rugbyklub het Saterdag 15 Augustus in hul laaste tuiswedstryd van die seisoen behoorlik teen Excelsiors van Wittedrift, net buite Plettenbergbaai, baljaar en met 64 - 15 oor hul besoekers gestoomroller.
Arrows het met rustyd in hul SWDRU Eerste Liga B-Wes-wedstryd met 24 - 8 voorgeloop.
Die tuisspan het nege keer teenoor die besoekers se twee keer agter die doellyn gaan kuier.
John Michaels, Arrows se heelagter, en Chaldon Lombaard, Arrows se senter, het elk twee drieë gedruk.
Met die sege het Arrows soete wraak geneem vir hul eerste ronde nederlaag vroeër in die seisoen.
In die eerste wedstryd van die dag het Excelsiors met 19 - 7 geseëvier nadat hulle rustyd met 12 - 0 voorgeloop het.
Arrows speel Saterdag 22 Augustus hul laaste wedstryd weg teen Titans van Mosselbaai en sal op hul beste moet wees om hul seisoen op ’n hoë noot af te sluit.
‘Ons bring jou die nuutste Tuinroete, Hessequa, Karoo nuus’
