Twee positief vir toekoms

STILBAAI NUUS - Dit gaan baie beter met beide mans wat op 7 Junie in 'n ernstige ongeluk was by die Skerpkoppies blinde draai.

Gavilan Green het in 'n kort onderhoud met Suid-Kaap FORUM genoem dat hy Donderdag, 1 Oktober op Mosselbaai by die Dagamaskop Operasionele kamer begin werk. "Ek kan regtig nie kla nie, want dit is net genade van Bo dat ek nog leef.

Ek het 'n tweede kans gekry en daarom wil ek Sy genade ten volle uitleef." Green het eers 'n voet en toe later sy been in die ongeluk verloor. "Die lewe is kosbaar en dit is belangrik dat mens reg moet leef, want jy weet nooit wanneer dit jou tyd is nie."

Shawn Swart wat saam met hom in die voertuig was en ernstige beserings opgedoen het is volgens sy verloofde, Linda Franken reeds ontslaan uit Groote Schuur Hospitaal en sterk tans tuis aan op Stilbaai.

"Dit gaan goed met hom. Hy het nog penne in sy regterbeen en 'n stut op sy linkerbeen en moet oor die weg kom met 'n rolstoel en krukke, maar vat elke dag op 'n slag. Sy gemoedstoestand is baie beter sedert hy by die huis is." Hy was in Groote Schuur vir 'n delikate spieroperasie op sy regterbeen.

Stilbaai Polisie is tans nog besig met die ondersoek van 'n saak van roekelose en nalatige bestuur. "Die klag word nou vir die staatsaanklaer gestuur vir beslissing of daar wel vervolging gaan wees of nie, " aldus ao Tekkie Grebe.