HESSEQUA NUUS - Slegte nuus vir inwoners is dat heelwat huishou-dings noustrop gaan trek met munisipale tariewe wat drasties styg.
Tariefverhogings tree op Woensdag, 1 Julie in werking met elektrisiteit wat 14.4% vir die aankoop van elektrisiteit vanaf Eskom (Nersa) styg, asook 'n gemiddelde munisipale tariefverhoging vir verkope van elektrisiteit van 12.2%.
Water styg met 8%, vullisverwydering met 12.5% en riool met 9%. Residensiële, besigheid, landelik, staat en leë erwe se eiendomsbelasting styg met 8.5%.
Dié tariewe is Maandag, 27 Mei goedgekeur tmet 'n meerderheidstem van die DA/COPE/Civic Independent koalisie tydens 'n spesiale raadsvergadering toe die 2015/2016 munisipale begroting en Geïntegreerde Ontwikkelings Plan (GOP) ter tafel gelê is. Die ANC-komponent van die raad het hul teenstem aangeteken.
'n Verdere bron van kommer is 'n kommentaar in rdl Emor Nel se begrotingsrede waarin sy noem dat munisipaliteite steeds wag op Nersa vir goedkeuring op Eskom se versoek vir 'n verdere 2% omgewingsheffing en ongeveer 10% verhoging in hul tariewe.
"Hierdie tariewe is nog nie ingesluit in die huidige tariefstruktuur of begroting nie."
Deernishulp ter waarde van R20 miljoen word vir die verligting van maandelikse tariewe, gratis elek-trisiteit, water, vullisverwydering, riool, asook die afskryf van uitstaande skuld aangewend.
Die raad subsidieer ook 50% van die koste vir die registrasie van huise (terugdateer na die 1990's) vir die verkryging van hul titelaktes.
"Op Slangrivier, 'n Wet 9-gebied ontvang inwoners elektrisiteit vanaf Eskom en hierdie hulpbehoewendes ontvang dus nie die gratis 50 eenhede elektrisiteit van Eskom nie. Die munisipaliteit koop die no-dige eenhede aan en voorsien dit aan hulle om regverdigheid te laat geskied."
Eienaars van eiendomme met verhuurbare besigheid-eenhede het goeie nuus ontvang dat die basiese fooitariewe aangepas is en beloop nou minder as in 2014/15.
* Die goedgekeurde 2015/2016 begroting, bylaes en goedgekeurde GOP is beskikbaar by die biblioteke op die onderskeie dorpe, asook by www.hessequa.gov.za
Verwante artikels:
- Tariewe gaan sakke skut
- Begroting: Finansiële gesondheid prioriteit
- Opvolg: Konsep begroting goedgekeur
ARTIKEL: LOUISE MOUTON, SUID-KAAP FORUM - JOERNALIS.
'Ons bring jou die nuutste Hessequa nuus'
